Fógraíonn an tAire Flanagan €2.5 milliún i maoiniú breise do Ghaza
12 October 2014
Tá €2.5 milliún i maoiniú breise fógartha ag an Rialtas do Ghaza.
Rinne an tAire Gnóthaí Eachtracha agus Trádála, Charlie Flanagan, TD, an fógra le linn dó a bheith ag labhairt ag mórchomhdháil idirnáisiúnta faoi atógáil Ghaza inniu i gCaireo.
Dhírigh an chomhdháil go háirithe ar riachtanais dhaonnúla reatha agus an méid ollmhór atógála nach mór a dhéanamh i nGaza, ach dhírigh rannpháirtithe chomh maith ar an ngéarghá lena chinntiú nach dtarlódh a leithéid de choimhlint arís.
Dúirt an tAire Flanagan i gCaireo:
“Tá cúrsaí daonnúla fós an-dona i nGaza agus is léir go mbeidh acmhainní suntasacha de dhíth chun na riachtanais láithreacha a chomhlíonadh agus freisin don chúnamh téarnaimh agus don atógáil fhadtéarmach.
“Cuirfidh Éire €2.5 milliún breise leis an bhfreagairt daonnúil a fhreastalóidh ar na riachtanais phráinneacha láithreacha chomh maith leis na hiarrachtaí ar mhaithe le téarnamh fadtéarmach.
“Chuir an chomhdháil deis thábhachtach ar fáil chun plé a dhéanamh ar conas déileáil go héifeachtach leis na ceisteanna bunúsacha ba chúis leis an gcoimhlint seo le déanaí, chun a chinntiú nach mbeidh orainn dul trína leithéid de bhabhta uafásach foréigin arís go brách agus chun todhchaí níos fearr do gach Palaistíneacha gus do gach Iosraelach a chinntiú.”
Is cuid í an chomhdháil, atá comh-eagraithe ag Rialtais na hÉigipte agus na hIorua , den fhreagairt idirnáisiúnta ar an gcoimhlint i nGaza le déanaí. Uachtarán Al Sisi na hÉigipte a d’oscail an chomhdháil agus tá freastal á dhéanamh uirthi ag Ard-Rúnaí na Náisiún Aontaithe Ban Ki-moon, Ard-ionadaí an AE Catherine Ashton, Státrúnaí Mheiriceá Kerry chomh maith le hAirí Gnóthaí Eachtracha an AE agus ó thíortha eile.
Mar fhreagairt ar an ngéarchéim reatha i nGaza, chuir Éire €500,000 ar fáil ar dtús d’Achainí Géarchéime an UNRWA i mí Iúil. Tá an tacaíocht seo ag cuidiú le bia, dídean agus cúnamh leighis a bhfuil géarghá leo a sholáthar do na mílte teaghlach, a raibh ar a lán acu teitheadh as a gcuid tithe. Tá €1 milliún ar an iomlán curtha ar fáil ag Éirinn anois don UNWRA i comhair na géarchéime reatha.
D’fháiltigh an tAire Stáit d’Fhorbairt, Trádáil agus Chomhar Thuaidh Theas, Seán Sherlock TD, roimh an bplean atógála do Ghaza a cuireadh i láthair i gCaireo:
“Díríonn an Plean Náisiúnta Atógála agus Luaththéarnaimh, a cuireadh i láthair ag an gcomhdháil inniu ar na hiarrachtaí i nGaza a bhrú níos faide ná faoiseamh láithreach agus i dtreo forbartha atá níos fadtéarmaí. Fáiltím roimh iarrachtaí aontaithe na bPalaistíneach ar fad a thacaíonn leis an Uachtarán Abbas chun pleanáil d’atógáil Ghaza agus chun saothrú chun deireadh a chur leis na heasaontais atá i measc Palaistíneach le rófhada.”
Thug an tAire Flanagan óráid ar son na hÉireann.
CRÍOCH
Preasoifig
12 Deireadh Fómhair 2014
