Fianáin

Úsáidimid fianáin ionas go bhfaighidh tú an taithí is fearr ar ár láithreán agus comhlíonaimid ár gceanglais Cosanta Sonraí ag an am céanna. Lean ort gan do chuid socruithe a athrú, agus gheobhaidh tú fianáin, nó athraigh do chuid socruithe fianáin ag aon tráth.

Díríodh ar an mBreatimeacht le linn na cuairte a thug an tAire Flanagan ar Londain

Minister Charles Flanagan, Próiseas Síochána Thuaisceart Éireann, Preas Ráiteas, Tuaisceart Éireann, Éireann, An Bhreatain Mhór, 2016

Bhí an tAire Gnóthaí Eachtracha agus Trádála, Charlie Flanagan, i Londain inniu (Dé Céadaoin) i gcomhair sraith cruinnithe.

I measc na gcruinnithe polaitiúla a bhí aige bhí ceann le Hilary Benn MP, Cathaoirleach an Choiste Parlaiminte um Imeacht as an Aontas Eorpach; le Scáth-Státrúnaí an Lucht Oibre um Thuaisceart Éireann, Dave Anderson agus leis an nGrúpa Parlaiminteach Uile-Pháirtí ar na hÉireannaigh sa Bhreatain.

Ag trácht dó ar a chuid cruinnithe polaitiúla, dúirt an tAire Flanagan:

"Bhí ríméad orm deis chaibidlíochta maidir leis an mBreatimeacht a bheith agam inniu le comhaltaí parlaiminte ó pháirtithe éagsúla in Westminster. Mhínigh mé an cur chuige agus an dearcadh atá ag rialtas na hÉireann agus d'fhoghlaim mé níos mó faoin obair atá idir lámha ar leibhéal na bpáirtithe agus in Westminster.

"Táim féin i mo chomhalta parlaiminte le breis agus 25 bliana anuas agus mar sin is maith mar a thuigim an tábhacht a bhaineann le plé a chothú le dreamanna eile chomh maith le hairí rialtais. Is mór agam dearcadh agus ról na gcomhaltaí parlaiminte agus bhí cruinnithe an lae inniu an-úsáideach ar fad.

"Bhí díospóireacht fhónta agam féin agus Dave Anderson MP freisin faoin méid atá ag tarlú i dTuaisceart Éireann. Dhearbhaigh mé arís tiomantas láidir Rialtas na hÉireann i leith Comhaontú Theach Stormont agus an Comhaontú um Thús Nua a chur chun feidhme ina n-iomláine, lena n-áirítear an cheist ríthábhachtach i ndáil le bunú na n-institiúidí chun déileáil le hoidhreacht an ama atá thart. D'athdhearbhaigh mé ár dtiomantas d'fhorálacha Chomhaontú Aoine an Chéasta a chosaint, do theorainn dhofheicthe a choinneáil slán agus do gheilleagar an oileáin seo a chosaint i gcomhthéacs an Bhreatimeachta."

Chuir an tAire tús leis an lá le cruinniú ag ar bhuail sé le grúpa Éireannach sa Ríocht Aontaithe atá ina mbaill de Líonra Éireannaigh an Domhain. Dúirt an tAire:

"Is mór ag rialtas na hÉireann an tiomantas atá ag Líonra Éireannaigh an Domhain ar fud na cruinne don phobal Éireannach thar lear. Bhí áthas orm maidin inniu a chloisteáil dom féin an dearcadh atá ag roinnt de lucht ár ndiaspóra is fearr ar éirigh leo ar na dúshláin agus na deiseanna a ghabhann leis an mBreatimeacht."

Ina theannta sin, thug an tAire Flanagan aitheasc uaidh ag Ambasáid na hÉireann os comhair tionól daoine a raibh baint acu le cuimhneachán an chéid in 2016, cuimhneachán ar éirigh go geal leis.

Dúirt sé:

"Céad bliain tar éis Éirí Amach na Cásca, ba mhaith an deis a bhí againn aird a dhíriú ar chultúr saibhir agus stair éagsúil an oileáin seo againne. Chuir ár bhfoireann i Londain, faoi cheannaireacht an Ambasadóra Mulhall, clár láidir imeachtaí ar bun a thug léargas ar an gcaoi a ndeachaigh an Chéad Chogadh Domhanda agus Éirí Amach na Cásca i gcion ar Éirinn, agus a chabhraigh linn cur lenár dtuiscint ar ár stair féin sa Ríocht Aontaithe. Táim thar a bheith sásta go raibh na céadta mílte duine sa Ríocht Aontaithe ag gabháil do chlár leathan imeachtaí oifigiúla chun cothrom céad bliana a cheiliúradh i rith na bliana cuimhneacháin sin ar bhain an-tábhachtach léi d'Éirinn."

CRÍOCH
An Phreasoifig
7 Nollaig 2016