Fianáin

Úsáidimid fianáin ionas go bhfaighidh tú an taithí is fearr ar ár láithreán agus comhlíonaimid ár gceanglais Cosanta Sonraí ag an am céanna. Lean ort gan do chuid socruithe a athrú, agus gheobhaidh tú fianáin, nó athraigh do chuid socruithe fianáin ag aon tráth.

Cruinniú déthaobhach ag an Aire Flanagan leis an Aire Kishida, Aire Gnóthaí Eachtracha na Seapáine

Cultúr, Minister Charles Flanagan, Caidreamh Taidhleoireachta, Preas Ráiteas, An Áise agus an Aigéine, 2017

Cruinniú déthaobhach idir an tAire Flanagan agus an Aire Kishida, Aire Gnóthaí Eachtracha na Seapáine, roimh imeacht lena cheiliúradh go bhfuil 60 bliain imithe tharainn ó bunaíodh an caidreamh taidhleoireachta idir Éire agus an tSeapáin

Bhí Aire Gnóthaí Eachtracha agus Trádála na hÉireann, an tUasal Charles Flanagan, TD, ina óstach tráthnóna inniu ag an Searmanas Oscailte lena cheiliúradh go bhfuil 60 bliain imithe tharainn ó bunaíodh an caidreamh taidhleoireachta idir Éire agus an tSeapáin. Ba é an tUasal Fumio Kishida, Aire Gnóthaí Eachtracha na Seapáine, an tAoi Oinigh ag an ócáid.

Ag labhairt dó ag an ócáid, dúirt an tAire Flanagan:

"Is mór an onóir dom é fáilte a chur roimh an Aire Kishida go hÉirinn ag an ócáid an-speisialta seo, an chéad chuairt ó Aire Gnóthaí Eachtracha de chuid na Seapáine le níos mó ná 25 bliana anuas.

Is suaithinseach an tréimhse í 60 bliain i bhféilire na Seapáine, óir léiríonn sí deireadh le timthriall beatha amháin agus tús an chéad timthrialla eile. Fágann traidisiún sin na Seapáine go bhfuil deis iontach againn féachaint ar an gcaidreamh den scoth atá eadrainn le 60 bliain anuas, agus breathnú ar aghaidh go dtí an chéad 60 bliain eile. Is ócáid é an comóradh seo ina bhféadaimid an cairdeas láidir eadrainn a cheiliúradh, cairdeas atá bunaithe ar luachanna comhroinnte. Bhí plé an-úsáideach agam leis an Aire Gnóthaí Eachtracha Kishida agus d'aontaíomar neartú agus treisiú a dhéanamh ar na naisc eadrainn sna blianta atá romhainn.

Is cúis áthais dom freisin seoladh a dhéanamh ar staidéar ó IIEA, a choimisiúnaigh mo Roinn, ina ndéantar mapáil ar an gcaidreamh déthaobhach idir Éire agus an tSeapáin. Is ábhar léitheoireachta tábhachtach é do dhuine ar bith ar suim leis nó léi an caidreamh déthaobhach idir Éire agus an tSeapáin, agus beidh sé ina threoir úsáideach do dhaoine ar mian leo chun cur lena gcuid rannpháirtíochta leis an tSeapáin."

Dúirt an tAire Kishida:

"Le 60 bliain anuas, tá caidreamh láidir comhair bunaithe ag an tSeapáin agus Éire lena chéile, caidreamh atá bunaithe ar an tsaoirse, an daonlathas, cearta an duine agus an smacht reachta, luachanna bunúsacha ar mór againn araon iad.

Sa chruinniú déthaobhach idir mé féin agus an tAire Flanagan níos luaithe inniu, d'aontaíomar cur leis an gcomhar eadrainn san obair a dhéanaimid le chéile ar mhaithe le dul i ngleic le saincheisteanna idirnáisiúnta, amhail dí-armáil agus neamh-iomadú, cothú na síochána, agus imeacht na Ríochta Aontaithe ón Aontas Eorpach.

Lena chois sin, ba mhaith leis an tSeapáin comhoibriú le hÉirinn lena chinntiú go bhfeidhmeoidh oibríochtaí gnó de chuid cuideachtaí príobháideacha sa Ríocht Aontaithe agus san Aontas Eorpach go réidh agus an Ríocht Aontaithe ag tarraingt siar ón Aontas."

D'fhreastail Ambasadóir na Seapáine chun na hÉireann, Mari Miyoshi Uasal, agus Ambasadóir na hÉireann chun na Seapáine, Anne Barrington, ar an Searmanas Oscailte freisin.

Léiríodh roinnt traidisiún Seapánach ag an ócáid, agus bhain na haíonna taitneamh as taispeántas drumadóireachta taiko agus rince Gaelach ag gabháil léi, sampla iontach den ealaín thraschultúrtha.

CRÍOCH