Skip to main content

Fianáin

Úsáidimid fianáin ionas go bhfaighidh tú an taithí is fearr ar ár láithreán agus comhlíonaimid ár gceanglais Cosanta Sonraí ag an am céanna. Lean ort gan do chuid socruithe a athrú, agus gheobhaidh tú fianáin, nó athraigh do chuid socruithe fianáin ag aon tráth.

Cruinniú idir an tAire Stáit McEntee agus Ard-Rúnaí Chomhairle na hEorpa, an tUasal Jagland

Inniu bhuail an tAire Stáit um Ghnóthaí Eorpacha, Helen McEntee, TD, le hArd-Rúnaí Chomhairle na hEorpa, an tUasal Thorbjørn Jagland, chun plé a dhéanamh i dtaobh na hoibre a dhéanann Comhairle na hEorpa agus an ról atá aici maidir le cearta an duine a chosaint agus a chur chun cinn.

Chuir an tAire McEntee in iúl an meas atá aici ar cheannaireacht láidir an Ard-Rúnaí Jagland ar Chomhairle na hEorpa. Chuir sí i gcuimhne dó go dtugann Éire tacaíocht láidir do Chomhairle na hEorpa agus go bhfuil an tír seo ina ball gníomhach den Chomhairle ó bunaíodh í i 1949. Mhol an tAire McEntee an obair a dhéanann Comhairle na hEorpa agus an Chúirt Eorpach um Chearta an Duine agus dúirt:

"Is é an Chúirt Eorpach um Chearta an Duine an fóram is tábhachtaí maidir le cearta an duine a chosaint san Eoraip. Leis na breithiúnais uaithi. ní hamháin gur tugadh treoir do bhallstáit Chomhairle na hEorpa, ach freisin do thíortha eile ar fud an domhain, i ndáil leis na céimeanna nach mór dóibh a ghlacadh chun cearta bunúsacha a urramú agus a dhaingniú. In Éirinn, tá muid an-eolach ar na buntáistí a bhaineann le hobair na Cúirte maidir le cearta an duine a chur chun cinn agus tá áthas orainn a bheith ag tacú leis an gCúirt ina cuid oibre."

Tabharfaidh an tArd-Rúnaí Jagland spreagaitheasc ag Teach Uíbh Eachach ar oíche an 29 Meitheamh faoi ról agus tionchar na Cúirte Eorpaí um Chearta an Duine." Le linn a chuairte, beidh an tArd-Rúnaí Jagland ag bualadh freisin leis an Uachtarán Ó hUiginn, leis an Aire Dlí agus Cirt, Charlie Flanagan TD agus leis an gCeann Comhairle, Seán Ó Fearghaíl TD.

CRÍOCH
An Phreasoifig
29 Meitheamh 2017