Fianáin

Úsáidimid fianáin ionas go bhfaighidh tú an taithí is fearr ar ár láithreán agus comhlíonaimid ár gceanglais Cosanta Sonraí ag an am céanna. Lean ort gan do chuid socruithe a athrú, agus gheobhaidh tú fianáin, nó athraigh do chuid socruithe fianáin ag aon tráth.

Fáilte abhaile go hÉirinn roimh Ibrahim Halawa ón Aire Gnóthaí Eachtracha agus Trádála

Minister Simon Coveney, Éireann, Consalachta, Preas Ráiteas, Éireann, 2017

Tá sé deimhnithe ag an Aire Gnóthaí Eachtracha agus Trádála, Simon Coveney TD, go bhfuil Ibrahim Halawa tagtha abhaile go hÉirinn agus gur bhuail sé lena theaghlach.

Shroich sé Baile Átha Cliath níos luaithe inniu i gcuideachta Nosayba, deirfiúr leis, agus Ambasadóir na hÉireann chun na hÉigipte, Sean O'Regan. Ar iarratas ó Ibrahim agus a theaghlach, rinne an Roinn Gnóthaí Eachtracha agus Trádála socruithe ionas go bhféadfadh sé bualadh lena theaghlach i limistéar príobháideach in aerfort Bhaile Átha Cliath.

Tuigtear go mbeidh Ibrahim ag caitheamh roinnt laethanta in áit phríobháideach le daoine muinteartha leis.

Dúirt an tAire Coveney:

"Tá áthas orm a dheimhniú go bhfuil Ibrahim Halawa tagtha ar ais go hÉirinn anois agus gur tháinig sé féin agus a theaghlach ar ais le chéile arís.

"Is sona sásta an lá é do Ibrahim agus dá theaghlach, agus is mór an ríméad atá ar gach duine dá chairde agus dá lucht tacaíochta freisin.

"Tá mé féin agus mo chomhghleacaithe go léir sa Rialtas thar a bheith sásta go bhfuil Ibrahim tagtha as an ngábh anois, agus go bhfuil sé ar ais sa mbaile lena theaghlach.

"Is iomaí dúshlán a bheidh le sárú ag Ibrahim agus é ag déileáil leis an méid a tharla dó, agus leis na hathruithe go léir atá tagtha ar an saol a fhad agus a bhí sé faoi choinneáil san Éigipt.

"Beidh am agus spás ag teastáil uaidh sa tréimhse atá romhainn agus tá súil agam go léireofar meas ar a phríobháideacht féin agus ar phríobháideacht a theaghlach.

"Bhí an cás seo ar cheann de na cásanna consalachta is casta, is íogaire agus is deacra lena raibh Rialtas na hÉireann ag plé riamh. Tá obair na gcapall déanta ar son Ibrahim Halawa le fada ar na leibhéil is airde sa Rialtas, ag Parlaiminteoirí de chuid páirtithe éagsúla, agus áiríodh leis an obair sin rannpháirtíocht ar leibhéal na n-oifigeach agus na dtaidhleoirí sinsearach; comhairliúchán, idirphlé agus abhcóideacht fhorleathan le comhpháirtithe san Aontas Eorpach agus ina lán príomhchathracha, leas a bhaint as saineolas i leith dhlí na hÉigipte agus an dlí idirnáisiúnta agus réimsí eile; agus tiomantas den scoth ag go leor seirbhísigh phoiblí agus oifigigh Ambasáide – idir thaidhleoirí agus bhaill foirne a bhíonn ag plé le cúrsaí áitiúla – le níos mó ná ceithre bliana anuas. B'fhada dorcha an bóthar a bhí romhainn uaireanta, ach bhí an dá phríomhchuspóir soiléir i gcónaí – Ibrahim a thabhairt abhaile, agus gach rud a d'fhéadfaí a dhéanamh chun a chearta agus a leas a chosaint agus é faoi choinneáil. Ba mhaith liom buíochas ó chroí a ghabháil thar ceann an Rialtais le gach duine a bhí páirteach san iarracht a chinntiú go mbainfí amach toradh an lae ghil seo, agus Ibrahim ar ais slán sábháilte lena mhuintir sa bhaile ar deireadh.

"Táim ag smaoineamh inniu ar Ibrahim agus a thuismitheoirí, a dheartháireacha agus a dheirfiúracha agus a mhórtheaghlach. Bhí feitheamh fada orthu i gcomhair an lae inniu; tá sé tuillte acu sult a bhaint as an lá."

CRÍOCH