Gradam Seirbhíse Dearscna an Uachtaráin 2013

Gradaim Seirbhíse Dearscna an Uachtaráin d’Éireannaigh Thar Lear 2013 á mbronnadh ag an Uachtarán Ó hUigín

An 26 Samhain 2013, bhronn an tUachtarán Ó hUigín Gradaim Seirbhíse Dearscna an Uachtaráin d’Éireannaigh Thar Lear 2013.

Tugtar onóir d’fhaighteoirí Ghradam Seirbhíse Dearscna an Uachtaráin d’Éireannaigh Thar Lear as seirbhís dearscna don náisiún i réimsí lena n-áirítear tógáil síochána, obair charthanachta, gnó, oideachas, na healaíona, cultúr agus spórt.

Bhunaigh an Rialtas Gradaim an Uachtaráin i ndiaidh Fhóram Eacnamaíoch Éireannaigh an Domhain 2011.

Tá seirbhís dearscna tugtha don náisiún ag faighteoirí Ghradaim 2013 agus chuir siad le dea-chlú na hÉireann ar fud na cruinne. Rannchuidiú as cuimse atá déanta acu.  Tá an t-ádh ar Éirinn ambasadóirí agus tacadóirí ardcháilíochta a bheith aici, leithéidí an Dr. Anne Merriman san Afraic agus an tSiúr Cyril Mooney san India, daoine a chabhraigh leis na mílte den dream is boichte ar domhan, agus Craig Barrett, nach bhfuil a leithéid le sonrú maidir le ceannaireacht sna réimsí teicneolaíochta agus oideachais. Aithnítear leis na gradaim seo freisin obair dhíograiseach, ríthábhachtach daoine mar Rodney Walsh sa Nua-Shéalainn agus Seamus McGarry agus Mary Tilki sa Ríocht Aontaithe, maidir le cúnamh a thabhairt do shaoránaigh Éireannacha thar lear.

Tabharfar onóir don Seanadóir George Mitchell i mí na Nollag as an bhfís agus an diongbháilteacht a léirigh sé agus é ag caitheamh a chuid ama, a chuid scileanna, agus  a chlú le síocháin a thógáil ar an oileán seo.

Le linn na hócáide chun onóir a thabhairt d’fhaighteoirí Ghradam 2013, dúirt an Tánaiste: “léirigh lucht faighte an ghradaim raon iomlán na dtréithe is fearr a bhíonn ag muintir na hÉireann.  Is daoine cruthaitheacha agus atruacha iad, mar a dúirt an tUachtarán níos luaithe.  Daoine láidre agus dianseasmhacha iad freisin.  Daoine mealltacha iad a mbíonn cuspóir acu”.  Agus é ag labhairt go díreach leis na daoine a fuair gradam, dúirt an Tánaiste: “is mar gheall ar bhur gcuid oibre agus an méid as cuimse ar bhain sibh amach a roghnaíodh sibh le haghaidh aitheantas ón Uachtarán.  Is mór an spreagadh dúinn sa bhaile sibh agus, tá a fhios agam, do na daoine a mbíonn sibh ag oibriú go díreach leo.”

Is iad seo a leanas na daoine a bhain Gradam Seirbhíse Dearscna an Uachtaráin 2013:

Na hEalaíona, Cultúr agus Spórt

Mick Moloney (US)

Obair Charthanachta

Anne Merriman (Uganda)

Sr Cyril Mooney (India)

Gnó agus Oideachas

Craig Barrett (US)

John Martin (France- OECD)

Tacaíocht do Phobal Éireannach

Mary Tilki (UK)

Seamus McGarry (UK)

Rodney Walshe (NZ)

Síocháin, Athmhuintearas agus Forbairt

George Mitchell (US)

Dan Rooney (US)