Fianáin

Úsáidimid fianáin ionas go bhfaighidh tú an taithí is fearr ar ár láithreán agus comhlíonaimid ár gceanglais Cosanta Sonraí ag an am céanna. Lean ort gan do chuid socruithe a athrú, agus gheobhaidh tú fianáin, nó athraigh do chuid socruithe fianáin ag aon tráth.

Skip to main content

An Bhulgáir

Má tá tú ag taisteal chun na Bulgáire, gheobhaidh tú leideanna praiticiúla agus eolas áisiúil sa mhír comhairle taistil agus san eolas nuashonraithe.

Níl an leagan Gaeilge ar fáil go fóill, más maith leat an leagan Béarla a léamh féach thíos.

Get travel and medical insurance

Before travelling, the Department strongly recommends that you obtain a European Health Insurance Card (EHIC), available by contacting the Health Service Executive, and that you also obtain comprehensive travel insurance which will cover all overseas medical costs, including medical repatriation/evacuation, repatriation of remains and legal costs. You should check any exclusions and, in particular, that your policy covers you for the activities you want to undertake.

Forléargas

Déanaimid ár ndícheall an chomhairle taistil is déanaí a thabhairt duit i nGaeilge, ach mar gheall go bhféadfadh athrú an-tapa teacht ar chúrsaí, go háirithe i gcás géarchéime, ní féidir linn a ghealladh go mbeidh an chomhairle taistil i nGaeilge go hiomlán cothrom le dáta.  Lena chinntiú go bhfaighidh tú an chomhairle is déanaí, go háirithe maidir le stádas slándála, féach an leagan Béarla chomh maith, nó déan teagmháil díreach linn.

Stádas slándála

Má tá tú ag pleanáil cuairt ar an mBulgáir, moltar duit réamhchúram a dhéanamh.

Cláraigh linn

Má tá sé i gceist agat cuairt a thabhairt ar an mBulgáir nó fanacht inti, ba chóir duit do chuid mionsonraí a chlárú linn, ionas go bhféadfaimid tú a aimsiú go tapa sa chás go dtarlódh géarchéim nach raibh súil léi, mar shampla tubaiste nádúrtha, nó eachtra éigeandála i do theaghlach, agus tú thar lear. Ansin, d’fhéadfaimis cabhair a thairiscint duitse nó do do theaghlach más gá.

Comhairle uainne

Moltar duit an méid is féidir a fhoghlaim faoin mBulgáir sula dtéann tú ann.

Moltar duit freisin an treoir taistil Eolas Roimh Thaisteal a léamh chun leideanna praiticiúla a fháil ar thaisteal thar lear.

Cárta Árachais Sláinte Eorpach

Moltar duit Cárta Árachais Sláinte Eorpach (EHIC) a fháil sula dtaistealaíonn tú chun na Bulgáire. Tháinig an cárta seo isteach in áit na foirme E111 agus tugann sé teidlíocht duit cóireáil liachta éigeandála a fháil ar na téarmaí céanna le náisiúnaigh de chuid na hOstaire.

Níl an EHIC beartaithe áit an árachais taistil a thógáil agus ní chlúdaíonn sé aisdúichiú liachta, cóireáil liachta leanúnach ná cóireáil nach bhfuil práinneach. Chomh maith leis sin, seans nach nglacfaidh gach ospidéal príobháideach leis an EHIC, agus mar sin ba chóir duit seiceáil leis an riarthóir roimh ré. Féadfaidh tú iarratas ar EHIC a dhéanamh ar líne ag www.ehic.ie.

Cúnamh Éigeandála

Is minic gur fearr a bhíonn daoine áitiúla in ann cabhrú leat, mar sin labhair le muintir na háite, d’ionadaí tionscnóra turas nó bainistíocht d’óstáin.

Déan teagmháil leis an Ambasáid

I gcás éigeandála, nó má tá cabhair agus comhairle uait, féadfaidh tú teagmháil a dhéanamh le Ambasáid na hÉireann i Sóifia.

Má ghlaonn tú lasmuigh d’uaireanta oibre, fág teachtaireacht le:

  • D'ainm
  • An cineál faidhbe atá agat
  • An áit a bhfuil tú anois
  • Do chuid mionsonraí teagmhála (uimhir fón póca nó uimhir theileafóin don áit a bhfuil tú ag fanacht ann)

Déanaimid monatóireacht rialta ar na teachtaireachtaí sin agus déanfaidh duine den fhoireann teagmháil leat.

Conas is féidir linn cabhrú leat

Tá go leor taithí againn cabhrú le saoránaigh de chuid na hÉireann a mbíonn fadhbanna acu agus iad thar lear. Foghlaim níos mó faoin gcineál cúnaimh éigeandála is féidir linn a thairiscint duit.

Sábháilteacht agus Slándáil

Comhairle phraiticiúil

  • Léigh an treoir taistil Eolas Roimh Thaisteal chun leideanna slándála áisiúla a fháil maidir le taisteal thar lear.
  • Faigh eolas go háitiúil maidir le ceantair lena mbaineann baol agus ábhair imní slándála
  • Déan réamhchúram ciallmhar maidir le sábháilteacht agus slándáil
  • Bíodh an té le dul i dteagmháil leis i gcás éigeandála ar eolas agat

Agóidí

Tá agóidí móra ag tarlú sna cathracha móra ó mhí an Mheithimh 2013, an ceann is mó i Sóifia.  Go ginearálta, bíonn siad síochánta ach meallann siad aird na ngrúpaí is measa a spreagann foréigean. Seachain sluaite agus lean na meán áitiúil agus comhairle na n-údarás. D’fhéadfadh na hagóidí cur isteach ar iompar poiblí chomh maith. 

Sceimhlitheoireacht

Cé gur baol íseal ó sceimhlitheoireacht atá sa Bhulgáir, tá baol domhanda ann fós ó ionsaithe sceimhlitheoireachta neamh-idirdhealaitheacha, a d’fhéadfadh a bheith dírithe ar thargaidí sibhialta, lena n-áirítear áiteanna ina gcruinníonn turasóirí agus saoránaigh. 

Coiriúlacht

Tá ráta coiriúlachta sách íseal sa Bhulgáir ach ba chóir duit réamhchúram ciallmhar a dhéanamh mar sin féin:

  • Ná bíodh do chárta creidmheasa, do thicéid taistil ná do chuid airgid ar iompar in éineacht agat – fág airgead breise agus nithe luachmhara in áit sábháilte
  • Ná bíodh do phas ar iompar agat ach amháin má tá géarghá leis agus fág cóip de do phas (agus de do dhoiciméid taistil agus árachais) le do theaghlach nó le cairde sa bhaile.
  • Ná taispeáin méideanna móra airgid go poiblí agus ná bain úsáid as ATManna tar éis thitim na hoíche, go háirithe má bhíonn tú leat féin. Seiceáil nach bhfuil aon duine do do leanúint tar éis duit do chuid gnó a chur i gcrích.
  • Coinnigh súil ghéar ar do chuid stuif agus coinnigh greim air in áiteanna poiblí mar caiféanna idirlín agus stáisiúin bus nó traenach.
  • Seachain sráideanna agus staighrí dorcha nó gan soilse. Socraigh síob a fháil ó/go dtí chomh gar do dhoras d'óstáin/d'árasáin agus is féidir.

Mionghadaíocht

Má thugann tú cuairt ar chathracha na Bulgáire, bí ag faire amach do pheasghadaithe. Tá sé sách sábháilte i Sóifia agus in áiteanna uirbeacha eile sa Bhulgáir ach tarlaíonn mionghadaíocht mar sin féin

Ná fág trealamh sciála agus scimeála sneachta gan aire sna háiteanna saoire sciála agus ná fág stuif pearsanta gan aire ar na tránna. Ná fág fuinneoga oscailte agus cuir glas ar an doras is tú ag fágáil seomra óstáin gan aon duine ann.

Tharraing roinnt eachtraí foréigneacha caint san am atá caite agus deirtear go raibh baint le lucht coiriúlachta eagraithe leo. Is annamh go mbeadh éifeacht ag eachtra mar sin ar thurasóirí ach moltar duit achrann a sheachaint a mhéid is féidir, go háirithe i gclubanna agus beáir.

Tacsaithe

Uaireanta gearrann tiománaithe tacsaí an iomarca airgid ar thurasóirí, go háirithe ag aerfoirt, stáisiúin bus agus traenach agus lasmuigh d’óstáin. Moltar duit cuideachtaí tacsaí dea-cháilithe a úsáid agus carranna a bhfuil méadair iontu a léiríonn rátaí go soiléir le greamán ar thaobh an phaisinéara den ghaothscáth. Seiceáil na rátaí sin le go bhfeicfidh tú go bhfuil luach ar airgead á fháil agat.  

Tá dhá chuideachta tacsaí ceadúnaithe chun oibriú as Aerfort Sóifia:

  • Ok Supertrans (ОК Супертранс sa Bhulgáiris)
  • Taxi S Express (Такси С Експрес sa Bhulgáiris)

Tá deasca laistigh den halla teachta agus is féidir tacsaí a ordú ag na deasca sin. Tá roinnt cuideachtaí a ligean orthu féin gur iad na cuideachtaí sin iad, agus ainmneacha cosúla acu, ach gearrann siad an iomarca airgid. 

Idir BGN 0.57 agus 0.70 in aghaidh an chiliméadair a bhíonn sa ghnáthráta seachbhuaice (beagán níos airde ag buaic-amanna).

‘Stil’ Taxi atá ceadúnaithe oibriú as Aerfort Varna agus ‘Srebrin Argirov - ORAK’ as Aerfort Bourgas.

Tá uasráta BGN3.00 (buaic-am) agus BGN3.50 (seachbhuaice) in aghaidh an chileaméadair socraithe do ráta méadair na dtacsaithe sa cheantar uirbeach Sunny Beach/Nessebar. Ba chóir praghsanna a thaispeáint agus níor chóir dóibh a bheith níos airde ná an t-uasleibhéal oifigiúil. Tuairiscítear go ndéantar méadair a ‘phumpáil’ uaireanta sa cheantar sin.  

Má cheapann tú gur gearradh an iomarca airgid ort, féadfaidh tú dul i dteagmháil leis na póilíní tráchta (KAT) ag an uimhir éigeandála 112. Nó féadfaidh tú d'admháil agus mionsonraí cláraithe an tiománaí a thabhairt leat go dtí cuideachta bainistíochta na háite saoire Sunny Beach JSC.

Coiriúlacht a chur in iúl

Má fhulaingíonn tú coir agus tú sa Bhulgáir, cuir in iúl do na póilíní láithreach é. Glaoigh ar 112 i ngach cás éigeandála (Dóiteán, Otharcharr, Póilíní) as áit ar bith sa Bhulgáir, saor in aisce ó líne talún nó fón póca.   

Tabhair ar aird nach mbíonn stáisiún póilíní i ngach sráidbhaile beag agus mar sin má theastaíonn cabhair ó na póilíní uait b’fhéidir nach mbeidh sin ar fáil láithreach. 

Is féidir glaoch ar an tseirbhís tarrthála sléibhe i Bankso ag +35974988132, +35974988133 or +359887100241. Féadfaidh tú teagmháil a dhéanamh linn ag Ambasáid na hÉireann i Sóifia má tá cabhair uait.

Tiomáint

Más mian leat a bheith ag tiomáint sa Bhulgáir ba chóir duit a bheith thar a bheith cúramach. Bíonn coinníollacha bóithre contúirteacha ann agus ní choinnítear bóithre agus cosáin i riocht maith i gcónaí, ní bhíonn siad lasta go maith agus bíonn linntreoga ann. Moltar duit gan tiomáint san oíche, go háirithe lasmuigh de na cathracha móra.

Bíonn sé deacair tiomáint sa Bhulgáir sa gheimhreadh uaireanta agus ba chóir duit tú féin a ullmhú i gceart. De réir an dlí, ní mór na ceannsolais a chur ar siúl ó 1 Samhain go 31 Márta.

Más mian leat a bheith ag tiomáint:

  • Tabhair leat do cheadúnas tiomána Éireannach iomlán agus bí cinnte go bhfuil árachas iomchuí agus dóthanach agat
  • Má tá tú chun do charr féin a thabhairt leat, bíodh an clárú bunaidh agus na doiciméid úinéireachta leat
  • Ní mór ‘vignette’nó greamán cánach bóthair a bheith ar taispeáint ar charr le taisteal ar na bóithre idir cathracha sa Bhulgáir. Is féidir iad sin a cheannach ag stáisiúin peitril mhóra, in oifigí poist, ag oifigí den bhanc DZI agus ag pointí teorann agus calafoirt.
  • Tá sé in aghaidh an dlí tiomáint faoi thionchar an óil nó drugaí agus tá baol go gcoinneofaí tú, go gcuirfí fíneáil ort nó go gcuirfí toirmeasc ar thiomáint ort dá mbéarfaí ort
  • Bí ar an eolas faoi dhlíthe tráchta na Bulgáire, mar shampla luasteorainneacha
  • Caith crios sábhála i gcónaí
  • Coinnigh doirse na feithicle faoi ghlas agus ná bíodh málaí le feiceáil, ar fhaitíos go ndéanfaí iarracht iad a ghoid agus tú stoptha ag soilse tráchta

Tiománaithe sa Bhulgáir

Tiomáintear go hionsaitheach sa Bhulgáir agus moltar duit achrann le tiománaithe ionsaitheacha a sheachaint. Bíonn go leor leor trucailí agus leoraithe ar na bóithre móra ag tarraingt ar an Tuirc agus an nGréig. Is minic go mbíonn feithiclí ag taisteal an-mhall agus á dtarraingt ag ainmhithe a fheiceáil ar na bóithre. Bíonn daoine ag tiomáint thar a bheith tapa freisin agus mar sin ba chóir duit a bheith ar an airdeall i gcónaí.

Bí thar a bheith cúramach ag trasnáin nach bhfuil comhartha soiléir ann – ag an tiománaí ag teacht ó thaobh na láimhe deise a bhíonn an ceart slí.   

Luasteorainneacha

50km/h i gcathracha agus bailte, 90km/h lasmuigh de bhailte agus 130 km/h ar mhótarbhealaí. Maidir le gluaisrothair, is iad na luasteorainneacha ná 50 km/h i gcathracha agus bailte, 80 km/h lasmuigh de bhailte agus 100 km/h ar mhótarbhealaí.

Póilíní tráchta

Bíonn seicphointí póilíní coitianta, go háirithe is tú ag fágáil bailte agus gearrtar fíneálacha ar an láthair ar mhionsháruithe.  Tuairiscítear go mbíonn roinnt póilíní ag iarraidh airgead  a fháscadh trí fhíneálacha a ghearradh. 

Feithicil a fhruiliú

Má tá feithicil á fruiliú agat, moltar duit gan do phas a thabhairt ar lámh mar shlándáil. Fiú má thugann tú cead do phas a fhótachóipeáil, bíodh sé le feiceáil agat an t-am ar fad.

Má tá carr fruilithe á thabhairt isteach sa Bhulgáir agat, bí cinnte go bhfuil an conradh bunaidh agat. Ba chóir go mbeadh sé ar an gconradh gur féidir an carr a thabhairt isteach sa Bhulgáir.

Seiceáil go bhfuil árachas dóthanach agat agus léigh téarmaí & coinníollacha an chonartha fruilithe feithicle (go háirithe aon tarscaoileadh a mbeadh feidhm leis dá ndéanfaí damáiste don fheithicil).

Dlíthe agus gnásanna áitiúla

Comhairle phraiticiúil

  • Léigh an chomhairle taistil, cuir tú féin ar an eolas sula dtaistealaíonn tú agus faigh comhairle go háitiúil nuair a bhaineann tú ceann scríbe amach
  • Cuimhnigh go mbaineann na dlíthe áitiúla leatsa, mar chuairteoir, agus nach mór duit cloí leo
  • Bí measúil ar nósanna, ar thraidisiúin agus ar chleachtais áitiúla, mar go mb’fhéidir go bhféachfaí ar an gcaoi a n-iompraíonn tú féin mar iompar a bheadh as bealach, naimhdeach nó in aghaidh an dlí.

Drugaí neamhdhleathacha

Gearrtar pionós géar ar úsáid drugaí neamhdhleathacha (is cuma cén druga é), lena n-áirítear fíneálacha agus téarmaí príosúin fada. 

Teanga

Tá teanga na Bulgáire bunaithe ar an aibítir Coireallach, agus seans nach mbeidh comharthaí eolais aistrithe go Béarla lasmuigh de na cathracha móra. Tabharfaidh leabhar treorach comhairle mhaith ó thaobh teanga duit.

Maoin a cheannach

Tá tóir ar an mBulgáir mar áit infheistíochta maoine le blianta beaga anuas. Má tá tú ag smaoineamh ar infheistíocht i maoin sa Bhulgáir a dhéanamh, moltar go láidir duit dlíodóir maoine neamhspleách le Béarla maith a fháil chun comhairle a chur ort, sula gceannaíonn tú maoin. 

Tógann sé roinnt mhaith ama sásamh dlí a fháil sa Bhulgáir má théann rudaí mícheart. Ní féidir linn baint a bheith againn le tionscnamh dlí idir dhá pháirtí príobháideach ná ní féidir linn gníomh chun aon infheistíocht i margaí maoine duine a aisghabháil.

Fágtar go leor maoine faoi úinéireacht eachtrannaigh folamh ar feadh tréimhsí fada. Molann póilíní na Bulgáire go gcuireann úinéirí socruithe slándála ar bun le linn na dtréimhsí sin.

Pósadh

Ní mór do dhuine den lánúin a bheith ina s(h)aoránach de chuid na Bulgáire nó ag cónaí ann le pósadh ann. 

Má chomhlíonann tú na critéir sin, beidh teastas speisialta de dhíth ort: Certificate de Coutume. Féadfaidh tú iarratas air sin a dhéanamh ag an Ambasáid i Sóifia má chónaíonn tú sa Bhulgáir, nó tríd an roinn Consalachta den Roinn Gnóthaí Eachtracha i mBaile Átha Cliath (is gá teastas a fhaightear i mBaile Átha Cliath a fháil apastalaithe ag an Roinn Gnóthaí Eachtracha agus Trádála le riachtanais na Bulgáire a chomhlíonadh). Beidh ort an teastas a chur faoi bhráid na hAireachta Gnóthaí Eachtracha i Sóifia ansin lena stampáil.

Má tá tú ag smaoineamh ar phósadh sa Bhulgáir, déan teagmháil leis an Ambasáid i Sóifia le comhairle a fháil.

Tubaistí nádúrtha agus an aeráid

Comhairle phraiticiúil

  • Má tá tú ag taisteal chun na Bulgáire, bí cinnte go dtuigeann tú cad atá romhat – ansin pleanáil agus pacáil dá réir
  • Faigh comhairle áitiúil faoin méid a cheart a dhéanamh i gcás eachtra tromchúiseach nó i gcoinníollacha contúirteacha
  • Comhoibrigh le húdaráis áitiúla agus le seirbhísí éigeandála i gcás eachtra tromchúiseach

Comhairle Taistil Te Fuara

Tuilte

Moltar a bheith cúramach i gceantar na Mara Duibhe chomh fada siar le Veliko Turnovo, i lár na Bulgáire agus go háirithe i Varna mar gheall ar thuilte a tharla le déanaí. Tá go leor áiteanna faoi uisce agus tá go leor bóithre dothrasnaithe. Is é ár gcomhairle d’Éireannaigh faoi láthair ná súil a choinneáil ar na meáin áitiúla le haghaidh forbairtí.

Crith talún

Tá an Bhulgáir i gcrios gníomhach ó thaobh creathanna talún. Déantar creatháin a thaifeadadh go rialta ach ní i gcónaí go dtugtar ar aird iad. I mí Bealtaine 2012 a tharla an chéad chrith talún mór ó 1977 ach níor tuairiscíodh aon damáiste mór ná gortú.

Tá rialtas na Bulgáire freagrach as cabhrú le náisiúnaithe coigríche i ndiaidh creatha talún. Moltar duit comhoibriú leo agus treoracha na n-údarás agus na seirbhísí éigeandála a leanúint, ar mhaithe le do shábháilteacht féin. 

Comhairle maidir le creathanna talún

Ní féidir a rá cathain a mbeidh an chéad chrith talún eile ann agus mar sin moltar duit tú féin a chur ar an eolas maidir le réamhchúram ciallmhar agus iarghníomhartha i gcás creatha talún.   

Má tá tú laistigh d’fhoirgneamh, téigh faoi bhord nó téigh isteach i gcúinne láidir. Ná seas in áit an dorais, in aice fuinneoige ná balla taobh amuigh. Má tá tú sa leaba, fan inti go stopann an creathán. Bíodh tóirse in aice láimhe.

Má tá tú taobh amuigh, fan amach ó chrainn, línte cumhachta agus foirgnimh arda, más féidir.  Crom síos agus clúdaigh do cheann agus do mhuineál le do lámha. Má tá tú i gcarr, stop ag tiomáint agus fan ann go stopann an creathadh.

Eolas Breise

Riachtanais iontrála (víosa/pas)

Níl víosa ag teastáil ó shaoránaigh de chuid na hÉireann le dul isteach sa Bhulgáir. Mar sin féin, tá a bpas féin riachtanach do leanaí le dul isteach sa tír. Má tá tú ag fanacht níos mó ná 90 lá ba chóir duit clárú leis na póilíní áitiúla agus cárta sealadach do chónaitheoirí a fháil.

Sláinte

Seiceáil le do dhochtúir i bhfad sula dtéann tú ag taisteal má tá aon vacsaíniú de dhíth don Bhulgáir.

Bíonn foireann sláinte dea-oilte de ghnáth sa Bhulgáir ach is minic nach mbíonn acmhainní maithe in ospidéil ná i gclinicí. Má tá tú ag fanacht in áit saoire, seiceáil cibé an saoráid liachta poiblí nó príobháideach atá ar fáil ann agus bí cinnte go bhfuil do dhóthain árachais agat nó gur féidir leat íoc as cóireáil má roghnaíonn tú saoráid phríobháideach.

Tuairiscíodh le déanaí go bhfuil otharchairr neamhdhleathacha ag feidhmiú san áit saoire sciála Bansko, agus go ngearrann siad táillí arda ar thurasóirí dul go dtí an t-ospidéal áitiúil. Má tharlaíonn sin duitse, déan tuairisc orthu leis na póilíní áitiúla.

Airgeadra

Lev na Bulgáire an t-airgeadra a úsáidtear agus is é airgead tirim an bealach is coitianta le híoc as rudaí. Tá níos mó is níos mó úsáid á baint as cártaí creidmheasa ach ní féidir brath orthu i ngach áit agus ní gach áit a nglacann leo. Tá fáil éasca ar ATManna agus glacann na cinn a bhaineann leis na bainc mhóra le cártaí na hÉireann. 

Is féidir Euro a aistriú go Lev i bhformhór na mbanc agus in bureaux de changes ar ghnáthráta. Bí ag faire na rátaí, áfach, agus ná húsáid ach bureaux ceadúnaithe. Moltar duit na cinn sa bhainc a úsáid más féidir. Seiceáil an ráta malartaithe ar d’admháil sula síníonn tú é mar d’fhéadfadh rátaí a bheith éagsúil ó na cinn ar taispeáint, ag brath ar an méid coimisiúin atá  á ghearradh.

Bí ar an airdeall má thagann aon duine chugat ar an tsráid ag iarraidh airgead a aistriú ar do shon, mar is daoine a bhíonn ag imirt camscéimeanna ar thurasóirí iad de ghnáth. Bí cúramach is tú ag úsáid ATManna, mar a bheifeá in Éirinn, mar tarlaíonn scimeáil cártaí freisin.  

Iarrann póilíní na Bulgáire ar aon duine a mbíonn fadhbanna acu le bureaux de change, nó calaois le ATM nó cárta creidmheasa é a chur in iúl don stáisiún póilíní is gaire dóibh chomh luath agus is féidir. Má chuirtear moill le cur in iúl, cuirtear moill ar fhiosrúchán.

Iompar poiblí

Tá an iompar poiblí ar fud na Bulgáire go maith, go ginearálta, ach bíonn caighdeáin éagsúla ar na busanna agus tramanna sna cathracha. Is féidir méid mór ticéad a cheannach ó bhothanna ticéad nó ticéad do thuras aonair a cheannach ar an mbus nó ar an tram. Tá córas metro a théann ó oirthear go iarthar Sóifia trí lár na cathrach agus táthar i mbun oibre chun an córas a leathnú amach.  

Tá sé saor agus iontaofa taisteal ar bhus nó aer laistigh den tír. Tá eitiltí intíre idir Sóifia, Plovdiv, Bourgas agus Varna atá éasca teacht orthu. Tá líonra fairsing busanna ann.

Níl an tóir céanna ar thraenacha agus níl an tseirbhís chomh compordach. Is féidir carranna a fhruiliú freisin, le cuideachtaí idirnáisiúnta mar Avis agus Hertz ag feidhmiú sa Bhulgáir, chomh maith le cuideachtaí áitiúla eile.