Fianáin

Úsáidimid fianáin ionas go bhfaighidh tú an taithí is fearr ar ár láithreán agus comhlíonaimid ár gceanglais Cosanta Sonraí ag an am céanna. Lean ort gan do chuid socruithe a athrú, agus gheobhaidh tú fianáin, nó athraigh do chuid socruithe fianáin ag aon tráth.

Skip to main content

An Iodáil

Má tá tú ag taisteal chun na hIodáile, gheobhaidh tú leideanna praiticiúla agus eolas áisiúil sa mhír comhairle taistil agus san eolas nuashonraithe.

Níl an leagan Gaeilge ar fáil go fóill, más maith leat an leagan Béarla a léamh féach thíos.

Get travel and medical insurance

Before travelling, the Department strongly recommends that you obtain a European Health Insurance Card (EHIC), available by contacting the Health Service Executive, and that you also obtain comprehensive travel insurance which will cover all overseas medical costs, including medical repatriation/evacuation, repatriation of remains and legal costs. You should check any exclusions and, in particular, that your policy covers you for the activities you want to undertake.

Forléargas

Déanaimid ár ndícheall an chomhairle taistil is déanaí a thabhairt duit i nGaeilge, ach mar gheall go bhféadfadh athrú an-tapa teacht ar chúrsaí, go háirithe i gcás géarchéime, ní féidir linn a ghealladh go mbeidh an chomhairle taistil i nGaeilge go hiomlán cothrom le dáta. Lena chinntiú go bhfaighidh tú an chomhairle is déanaí, go háirithe maidir le stádas slándála, féach an leagan Béarla chomh maith, nó déan teagmháil díreach linn.

Stádas slándála

Má tá tú ag pleanáil cuairt ar an Iodáil, moltar duit réamhchúram a dhéanamh.

Cláraigh linn

Má tá sé i gceist agat cuairt a thabhairt ar an Iodáil nó fanacht ann, ba chóir duit do chuid mionsonraí a chlárú linn, ionas go bhféadfaimid tú a aimsiú go tapa sa chás go dtarlódh géarchéim nach raibh súil léi, mar shampla tubaiste nádúrtha, nó eachtra éigeandála i do theaghlach, agus tú thar lear.  Ansin, d’fhéadfaimis cabhair a thairiscint duitse nó do do theaghlach más gá.

Comhairle uainne

Moltar duit an méid is féidir a fhoghlaim faoin Iodáil sula dtéann tú ann.

Moltar duit freisin an treoir taistil Eolas Roimh Thaisteal a léamh chun leideanna praiticiúla a fháil ar thaisteal thar lear.

Cárta Árachais Sláinte Eorpach

Moltar duit Cárta Árachais Sláinte Eorpach (EHIC) a fháil sula dtaistealaíonn tú chun na hIodáile. Tháinig an cárta seo isteach in áit na foirme E111 agus tugann sé teidlíocht duit cóireáil liachta éigeandála a fháil ar na téarmaí céanna le náisiúnaigh de chuid na Iodáile. I gcás éigeandála, is féidir leat dul chuig aon Pronto Soccorso (Seomra Timpistí agus Éigeandála) saor in aisce. Má mheastar san ospidéal nach éigeandáil a bhí ann i ndáiríre, d’fhéadfaí táille bheag a ghearradh ort.

Níl an EHIC beartaithe áit an árachais taistil a thógáil agus ní chlúdaíonn sé aisdúichiú liachta, cóireáil liachta leanúnach ná cóireáil nach bhfuil práinneach. Féadfaidh tú iarratas ar EHIC a dhéanamh ar líne ag www.ehic.ie.

Cúnamh éigeandála

Is minic gur fearr a bhíonn daoine áitiúla in ann cabhrú leat, mar sin labhair le muintir na háite, d’ionadaí tionscnóra turas nó bainistíocht d’óstáin.

Mionsonraí teagmhála éigeandála

Póilíní: Seirbhís Otharchairr: 118

Déan teagmháil leis an Ambasáid

I gcás éigeandála, nó má tá cabhair agus comhairle uait, féadfaidh tú teagmháil a dhéanamh le Ambasáid na hÉireann sa Róimh.

Má ghlaonn tú lasmuigh d’uaireanta oibre, fág teachtaireacht le:

  • D’ainm
  • An cineál faidhbe atá agat
  • An áit a bhfuil tú anois
  • Do chuid mionsonraí teagmhála (uimhir fón póca nó uimhir theileafóin don áit a bhfuil tú ag fanacht ann)

Déanaimid monatóireacht rialta ar na teachtaireachtaí sin agus déanfaidh duine den fhoireann teagmháil leat.

Conas is féidir linn cabhrú leat

Tá go leor taithí againn cabhrú le saoránaigh de chuid na hÉireann a mbíonn fadhbanna acu agus iad thar lear. Foghlaim níos mó faoin gcineál cúnaimh éigeandála is féidir linn a thairiscint duit.

Sábháilteacht agus Slándáil

Comhairle phraiticiúil

  • Léigh an treoir taistil Eolas Roimh Thaisteal chun leideanna slándála áisiúla a fháil maidir le taisteal thar lear
  • Faigh eolas go háitiúil maidir le ceantair lena mbaineann baol agus ábhair imní slándála
  • Déan réamhchúram ciallmhar maidir le sábháilteacht agus slándáil
  • Bíodh an té le dul i dteagmháil leis i gcás éigeandála ar eolas agat

Corraíl shibhialta

Tá cúrsaí polaitíochta san Iodáil réasúnta cobhsaí ach tarlaíonn léirsithe poiblí go minic, go háirithe i lár cathracha móra ar dócha go mbeadh turasóirí.

Bíonn siad dea-eagraithe de ghnáth agus is annamh a bhíonn siad foréigneach. Ach ba chóir duit iad a sheachaint agus a bheith ciallmhar má bhíonn tú i ngar do thionóil mhóra phoiblí.

Bíodh a fhios agat cad atá ar siúl i do thimpeall i gcónaí  trí mhonatóireacht a dhéanamh ar na meáin áitiúla, agus fanacht i dteagmháil le do theagmhálaí áitiúil, óstán nó do thionscnóir turas.

Sceimhlitheoireacht

Cé go bhfuil an baol ó sceimhlitheoireacht san Iodáil íseal, tá baol domhanda ann fós ó ionsaithe sceimhlitheoireachta neamh-idirdhealaitheacha, a d’fhéadfadh a bheith dírithe ar thargaidí sibhialta, lena n-áirítear áiteanna ina gcruinníonn turasóirí agus easaoránaigh. De ghnáth, bíonn go leor póilíní i láthair ag mórláithreáin turasóireachta, stáisiúin traenacha srl.

Coiriúlacht

Tá ráta coiriúlachta sách íseal san Iodáil ach ba chóir duit réamhchúram ciallmhar a dhéanamh mar sin féin:

  • Ná bíodh do chárta creidmheasa, do thicéid taistil ná do chuid airgid ar iompar in éineacht agat – fág airgead breise agus nithe luachmhara in áit shábháilte.
  • Ná bíodh do phas ar iompar agat ach amháin má tá géarghá leis agus fág cóip de do phas (agus de do dhoiciméid taistil agus árachais) le do theaghlach nó le cairde sa bhaile.
  • Ná taispeáin méideanna móra airgid go poiblí agus ná bain úsáid as ATManna tar éis thitim na hoíche, go háirithe má bhíonn tú leat féin. Seiceáil nach bhfuil aon duine do do leanúint tar éis duit do chuid gnó a chur i gcrích.
  • Seachain sráideanna agus staighrí dorcha nó gan soilse. Socraigh síob a fháil ó/go dtí chomh gar do dhoras d'óstáin/d'árasáin agus is féidir.
  • Coinnigh súil ghéar ar do chuid stuif agus coinnigh greim air in áiteanna poiblí mar caiféanna idirlín agus stáisiúin bus nó traenach.

Mionghadaíocht

Bí ar an eolas i gcónaí go bhfuil mionchoiriúlacht (peasghadaíocht, goid málaí srl) coitianta, go háirithe ar iompar poiblí agus in áiteanna a mbíonn turasóirí.

Ba chóir a bheith ar an airdeall maidir le nithe pearsanta i stáisiúin traenach (go háirithe Stáisiún Termini sa Róimh), in áiteanna poiblí in aerfoirt, ag gach láithreán turasóireachta agus nuair a úsáidtear seirbhísí bus, meitreo nó tram, lena n-áirítear málaí a thabhairt de chóistí a théann go dtí agus ó aerfoirt.

De ghnáth oibríonn peasghadaithe ar bhusanna plódaithe in áiteanna ina gcruinníonn turasóirí (go háirithe bus Uimh 64 a théann go Baisleac Pheadair sa Róimh), agus ar an tsráid. Oibríonn gadaithe i bhfoireann go minic, le duine amháin nó níos mó ag tarraingt aird an íospartaigh fad is a dhéanann an chuid eile an choir. Is minic gur leanaí ag iarraidh déirce a tharraingíonn aird an íospartaigh.

Sábháilteacht phearsanta

Tugadh roinnt eachtraí le fios dúinn le déanaí, líon atá ag dul i méid, inar cuireadh drugaí i ndeochanna taistealaithe, agus gur robáladh iad ina dhiaidh sin agus tógadh a gcuid airgid, cártaí creidmheasa agus fóin phóca. Moltar duit a bheith ar an airdeall i mbeáir, agus a bheith cúramach i ndáil le deochanna a thógáil ó strainséirí i gclubanna oíche agus in áiteanna a mbíonn turasóirí san oíche.

Coiriúlacht a chur in iúl

Má fhulaingíonn tú coir agus tú san Iodáil, cuir in iúl do na póilíní láithreach é.  Féadfaidh tú teagmháil a dhéanamh linn ag Ambasáid na hÉireann sa Róimh má tá cabhair uait.

Tiomáint

Má tá sé i gceist agat a bheith ag tiomáint san Iodáil, ba chóir duit a bheith cúramach mar gur féidir le trácht a bheith níos tapúla ná mar atá in Éirinn agus tá nósanna tiomána éagsúil. Ní mór do thiománaithe a bheith níos mó ar an airdeall agus níos cúramaí i gcathracha agus i mbailte mar go mbíonn gluaisrothair agus móipéidí níos forleithne.

Más mian leat a bheith ag tiomáint:

  • Tabhair leat do cheadúnas tiomána Éireannach iomlán nó do cheadúnas tiomána idirnáisiúnta agus bí cinnte go bhfuil árachas iomchuí agus dóthanach agat
  • Má tá carr cláraithe in Éirinn á thiomáint agat, déan cinnte go bhfuil sé árachas iomlán air agus bíodh do logleabhar, cruthúnas árachais agus deimhniú NCT (más cuí) ar iompar agat
  • Tá sé in aghaidh an dlí tiomáint faoi thionchar an óil nó drugaí agus tá baol go gcoinneofaí tú, go gcuirfí fíneáil ort nó go gcuirfí toirmeasc ar thiomáint ort dá mbéarfaí ort
  • Bí ar an eolas faoi dhlíthe tráchta na hIodáile, mar shampla luasteorainneacha
  • Caith crios sábhála i gcónaí
  • Coinnigh doirse na feithicle faoi ghlas agus ná bíodh málaí le feiceáil, ar fhaitíos go ndéanfaí iarracht iad a ghoid agus tú stoptha ag soilse tráchta
  • Bí cúramach agus tú ag casadh ar dheis ag acomhail, fiú má tá comhartha uaine ann, tá ceart slí ag coisithe ag trasnú an bhóthair a bhfuiltear ag casadh isteach ann
  • Tá ar gach tiománaí veist sho-fheicthe a chaitheamh agus triantán guaise so-fheicthe a úsáid má bhíonn orthu stopadh ar thaobh an bhóthair
  • Caithfear ceannsoilse a úsáid i gcónaí ar na mótarbhealaí (Autostrada) agus ar bhóithre móra

Rochtain Theoranta ar lár chathracha na hIodáile

Tá criosanna tiomána teoranta i bhfeidhm i lár go leor cathracha san Iodáil agus níl cead isteach ach ag carranna le ceadanna. Eiseofar fíneálacha ar charranna a rachaidh isteach sna criosanna gan chead. Marcáiltear teorainneacha criosanna teoranta den sórt sin le comharthaí “ZTL” (Zona Traffico Limitato / Crios Tráchta Teoranta).

De bhrí go bhféadfaidh comharthaí a bheith teoranta, d'fhéadfadh nach mbeadh sé soiléir i gcónaí go bhfuil crios teoranta i bhfeidhm. Ina theannta sin, léitear plátaí carranna go leictreonach agus b’fhéidir nach mbeadh a fhios agat faoi fhíneáil nó go bhfaighidh tú fógra sa phost roinnt míonna ina dhiaidh sin.

Moltar do thurasóirí comhairle a fháil go háitiúil cibé an bhfuil criosanna tráchta teoranta i bhfeidhm agus meas a léiriú do na rialacháin uile. Má tá d'óstán i lár na cathrach, b'fhéidir go mbeifeá in ann cead sealadach a fháil don chathair sin; déan teagmháil le d'óstán le haghaidh tuilleadh eolais.

Fíneálacha do chionta tráchta

Féadfar fíneálacha a eisiúint suas le bliain amháin tar éis an chion a dhéanamh agus féadfar iad a ardú mura n-íocfar iad laistigh de 60 lá. Foráiltear i gCóras na Slánródaíochta san Iodáil do roinnt fíneálacha "ar an láthair" freisin. Mura bhfuil tú in ann é a íoc, seolfar an fhíneáil chuig do sheoladh baile, agus féadfar é a ardú.

Mótarbhealaí na hIodáile

Tá eolas úsáideach ar fáil i mBéarla ón údarás atá freagrach as córas mótarbhealaí na hIodáile.

Coisithe

Ba chóir do choisithe cuimhneamh go mbeidh an trácht ag teacht ón taobh eile le hais mar a bhíonn in Éirinn. Ba chóir dóibh aird faoi leith a thabhairt ar an gcontúirt bhreise san oíche agus iad ag siúl ar bhóithre gan chosán ceart agus ag dul trasna an bhóthair fiú ag áit cheaptha le dul trasna an bhóthair.

Níl formhór na dtrasrianta coisithe rialaithe ag soilsithe, tá siad cosúil le trasrianta síogacha in Éirinn. Ach, uaireanta ní chloíonn tiománaithe leo sin, go háirithe ar ghluaisrothair agus ar mhóipéidí, agus ba chóir cúram ar leith a dhéanamh dá bhrí sin.

Feithicil a fhruiliú

Má tá feithicil á fruiliú agat, moltar duit gan do phas a thabhairt ar lámh mar shlándáil.  Fiú má thugann tú cead do phas a fhótachóipeáil, bíodh sé le feiceáil agat an t-am ar fad.

Seiceáil go bhfuil árachas dóthanach agat agus léigh téarmaí & coinníollacha an chonartha fruilithe feithicle (go háirithe aon tarscaoileadh a mbeadh feidhm leis dá ndéanfaí damáiste don fheithicil). Ba chóir duit do chonradh cíosa a bheith ar iompar agat i gcónaí freisin.

Dlíthe agus gnásanna áitiúla

Comhairle phraiticiúil

  • Léigh an chomhairle taistil, cuir tú féin ar an eolas sula dtaistealaíonn tú agus faigh comhairle go háitiúil nuair a bhaineann tú ceann scríbe amach
  • Cuimhnigh go mbaineann na dlíthe áitiúla leatsa, mar chuairteoir, agus nach mór duit cloí leo
  • Bí measúil ar nósanna, ar thraidisiúin agus ar chleachtais áitiúla, mar go mb’fhéidir go bhféachfaí ar an gcaoi a n-iompraíonn tú tú féin mar iompar a bheadh as bealach, naimhdeach nó in aghaidh an dlí

Drugaí neamhdhleathacha

Gearrtar pionós géar ar úsáid drugaí neamhdhleathacha (is cuma cén druga é), lena n-áirítear fíneálacha agus téarmaí príosúin fada.

Alcól

Ba chóir do chuairteoirí chun na hIodáile a bheith ar an eolas go mbíonn méid na ndeochanna biotáille a dhíoltar i mbeáir agus i mbialanna i bhfad níos mó ná mar atá in Éirinn.

Cé go n-ólann Iodálaigh fíon lena mbéilí de ghnáth, tá geis chultúir agus éadulaingt ann maidir le bheith ar meisce go poiblí agus go háirithe maidir le hiompar frithshóisialta mar gheall ar an iomarca alcóil a bheith ólta.

Iompar Poiblí

Ba chóir duit cloí le fógraí maidir le hiompar poiblí i gcathracha mar Flórans agus an Veinéis. Tá cosc ar bhia a ithe agus a bheith i do shuí ar chéimeanna nó ar shéadchomharthaí in áiteanna ar leith, i ngar do shéipéil agus i roinnt faichí. Tá ar chuairteoirí meas a léiriú lena gcuid éadaí ag séipéil agus ionaid adhartha, lena n-áirítear Baisleac Pheadair.

Pósadh san Iodáil

Caithfidh gach saoránach de chuid na hÉireann atá ag iarraidh pósadh san Iodáil nulla osta (teastas saoirse chun pósta) a fháil. Tá tuilleadh eolais maidir le conas iarratas a dhéanamh.

Tubaistí nádúrtha agus an aeráid

Comhairle phraiticiúil

  • Má tá tú ag taisteal chun na hIodáile, bí cinnte go dtuigeann tú cad atá romhat – ansin pleanáil agus pacáil dá réir 
  • Faigh comhairle áitiúil faoin méid a cheart a dhéanamh i gcás eachtra tromchúiseach nó i gcoinníollacha contúirteacha
  • Comhoibrigh le húdaráis áitiúla agus le seirbhísí éigeandála i gcás eachtra tromchúiseach

Comhairle Taistil Te Fuara

Aeráid

Athraíonn an aeráid go mór ón tuaisceart go deisceart na hIodáile. I dtuaisceart na tíre – an réigiún idir na hAlpa agus na hAipiníní na Tuscáine-Emilia – tá an aeráid crua, bíonn an geimhreadh an-fhuar agus bíonn sé an-te, an-bhogthais sa samhradh. Tá an aeráid níos boige i lár na hIodáile. Is lú an difríocht sa teocht sa gheimhreadh agus sa samhradh agus tá an séasúr fuar níos giorra agus níl sé go dian is a bhíonn sé sa tuaisceart; bíonn an samhradh níos faide, ach ní bhíonn sé chomh te ná chomh bogthais leis an tuaisceart mar gheall ar an bhfarraige. I ndeisceart na hIodáile agus sna hoileáin ní bhíonn an geimhreadh an-dona, agus bíonn teochtaí san earrach agus san fhómhar cosúil le teochtaí an tsamhraidh in áiteanna eile san Iodáil. Bíonn teochtaí an-éagsúil san Iodáil, i dtuaisceart, lár nó i ndeisceart na tíre.

Crith Talún

Tá go leor codanna den Iodáil suite ar mhór-éasclíne sheismeach. Tarlaíonn mionchreatháin agus creathanna talún mórán gach uile lá.

Tharla creathanna talún idir 5 agus 6 ar an scála Richter réigiún Emilia den Iodáil i mBealtaine 2012 agus lean creathanna agus iarchreathanna ar feadh míonna ina dhiaidh sin. Rinneadh damáiste mór do chinn scríbe turasóirí, lena n-áirítear Modena, Mantova agus cathracha i gcúige Ferrara. Meastar roinnt foirgneamh a bheith baolach fós agus tá damáiste forleathan déanta d'infreastruchtúr.

Is féidir tuilleadh eolais (in Iodáilis) a fháil ar na láithreáin ghréasáin seo a leanas:

www.provincia.fe.it ; www.provincia.modena.it ; www.provincia.re.it.

Tuilte

Ba chóir do chuairteoirí chuig an Veinéis a thabhairt ar aird go bhféadfadh tuilte tarlú ag amanna áirithe den bhliain, go háirithe go déanach san fhómhar agus go luath san earrach.

Sciáil

Má tá tú ag dul chuig ionad sciála, ba chóir duit comhairle a fháil faoin aimsir agus coinníollacha maidhmeanna sneachta sula dtéann tú ann agus cuir tú féin ar an eolas maidir le dlíthe agus rialacháin sciála áitiúla.

Eolas Breise

Riachtanais iontrála (víosa/pas)

Ní theastaíonn víosa ó shaoránaigh na hÉireann le dul chun na hIodáile. Ach, teastaíonn pas bailí uait ar feadh fad do chuairte san Iodáil.

Ag taisteal le leanaí

D’fhéadfadh sé tarlú go n-iarrfaí ar thuismitheoirí aonair agus na daoine sin atá ag taisteal le leanaí gan duine (nó beirt) de thuismitheoirí an linbh cruthúnas go bhfuil cead acu an leanbh a thabhairt ag taisteal. Déan teagmháil le hAmbasáid na hIodáile in Éirinn le haghaidh tuilleadh eolais maidir le cad a theastaíonn.

Sláinte

Ní theastóidh aon vacsaínithe ó shaoránaigh na hÉireann le dul chun na hIodáile. Má éiríonn tú tinn agus tú san Iodáil agus má bhíonn tuilleadh eolais uait maidir le rochtain a fháil ar chúram sláinte, déan teagmháil leis an Ambasáid.

Fiabhras Chikungunya

Tá cásanna d’Fhiabhras Chikungunya, ionfhabhtú víreasach a iompraíonn muiscítí, tuairiscithe le blianta beaga anuas thart ar Ravenna i réigiún Emilia-Romagna d’oirthear na hIodáile. Áirítear fiabhras ard, tinneas cinn, miailge agus artrailge, gríos agus uaireanta siomptóim ghastraistéigeacha ar na gnéithe cliniciúla a bhaineann leis.

Moltar do thaistealaithe réamhchúram ciallmhar a dhéanamh in aghaidh muiscítí. Is féidir tuilleadh eolais a fháil maidir le Fiabhras Chikungunya a fháil ar láithreán gréasáin an Ionaid Faireachais um Chosaint Sláinte.

H1N1 (An Fliú Mucúil)

Tuairiscíodh cásanna H1N1 (an Fliú Mucúil) san Iodáil. Tá láithreán gréasáin cruthaithe ag an Aireacht Sláinte a thugann eolas agus comhairle faoin víreas H1N1. Is féidir leat teagmháil a dhéanamh freisin leis an mbeolíne eolais phoiblí ar 1500, Luan go hAoine, ón 8am go 6pm.

Céannacht phearsanta

Faoi dhlí na hIodáile, tá ort ID le grianghraf a bheith ar iompar agat i gcónaí.

Taisteal áitiúil

Tacsaithe

Tá tacsaithe san Iodáil ceadúnaithe, agus tá comharthaí soiléire orthu. Tá méadair orthu agus beidh liosta de na muirir bhreise (uaireanta déanacha, málaí srl) laistigh díobh. Bíonn tiománaithe gan cheadúnas ag ligean orthu gur tacsaithe iad go minic ag aerfoirt agus ag calafoirt agus ba chóir iad a sheachaint mar de ghnáth bainfidh siad an iomarca airgid de thurasóirí. Moltar duit gan ach tacsaithe oifigiúla a úsáid.

Bí ar an eolas, nuair a chuireann tú glaoch ar thacsaí go dtosaíonn an méadar chomh luath is a chuirtear an tacsaí amach chugat. Dá bhrí sin, mar shampla, má deirtear leat go mbeidh “Tacsaí X” leat i gceann 5 nóiméad, ba chóir go mbeadh a fhios agat go mbeidh 5 nóiméad de tháille ar an méadar cheana féin nuair a thiocfaidh an tacsaí chomh fada leat.

Ar mhaithe le sábháilteacht, ná téigh isteach i dtacsaí nuair atá duine in éineacht leis an tiománaí cheana féin agus ná aontaigh leis an tiománaí duine eile a phiocadh suas.
Tá roinnt cuideachtaí tiománaithe ag cathracha móra freisin, atá in ann daoine a thabhairt ón aerfort go lár na cathrach nó a mhalairt ar phraghas iomaíoch go minic. Cuir ceist ag d’óstán le haghaidh tuilleadh eolais.

Tá buntáille de €30 socraithe ag údaráis áitiúla na Róimhe do thurais ó agus go dtí aerfort Ciampino agus lár na Róimhe (laistigh de na Ballaí Aurelian) agus €40 do thurais ó agus go dtí aerfort Fumincino agus lár na Róimhe (laistigh de na Ballaí Aurelian). Sula dtéann tú chun na Róimhe, seiceáil an bhfuil d’óstán in áit atá clúdaithe ag an gcomhaontú sin. Níor chóir go ngearrfaí aon airgead breise do mhálaí, do phaisinéirí breise srl.

Iompar Poiblí

Teastaíonn ticéid bhailí le haghaidh busanna, traenacha, tramanna agus an meitreo. Caithfear iad sin a cheannach roimh ré agus a bhailíochtú i meaisín bailíochtaithe sa stáisiún nó ar an mbus/tram. Mura mbeidh ticéad bailí agat gearrfar fíneáil ar an láthair de thuairim is €50 go €60 ort. Ní dhéanfaidh cigirí aon eisceacht do thurasóirí.

Féadfar ticéid a cheannach go minic i gcaiféanna beaga, go háirithe iad sin ina ndíoltar toitíní (bí ag faire amach don chomhartha T gorm a chiallaíonn Tabaccheria (siopa Tobac).

Tarlaíonn stailceanna Iompair Phoiblí sách minic san Iodáil, agus bíonn líon na seirbhísí laghdaithe nó ar fionraí uile. De ghnáth fógraítear iad roimh ré, agus ba chóir do thurasóirí iad féin a choinneáil ar an eolas faoi stailceanna a d’fhéadfadh tarlú agus faoin tionchar a d’fhéadfadh a bheith acu ar a bpleananna.

Airgead

B’fhéidir go dtabharfá faoi deara nach n-úsáidtear cártaí creidmheasa chomh forleathan san Iodáil is a dhéantar in Éirinn.