Fianáin

Úsáidimid fianáin ionas go bhfaighidh tú an taithí is fearr ar ár láithreán agus comhlíonaimid ár gceanglais Cosanta Sonraí ag an am céanna. Lean ort gan do chuid socruithe a athrú, agus gheobhaidh tú fianáin, nó athraigh do chuid socruithe fianáin ag aon tráth.

Skip to main content

An tSín

Má tá tú ag taisteal chun na Síne, gheobhaidh tú leideanna praiticiúla agus eolas áisiúil sa mhír comhairle taistil agus san eolas nuashonraithe.

Faigh árachas taistil agus liachta

Faigh árachas taistil cuimsitheach i gcónaí a chlúdóidh gach costas liachta thar lear, aslonnú liachta san áireamh, sula dtéann tú ag taisteal. Ní féidir linn íoc as aon chostais éigeandála a d’fhéadfadh a bheith ort ar do thuras. Mar sin, d’fhéadfadh árachas taistil go leor leor airgid a shábháil duit, má bhíonn fadhbanna agat. Ná déan dearmad na coinníollacha i do pholasaí a léamh agus a chinntiú go gclúdaíonn sé gach rud atá beartaithe agat a dhéanamh.

Forléargas

Déanaimid ár ndícheall an chomhairle taistil is déanaí a thabhairt duit i nGaeilge, ach mar gheall go bhféadfadh athrú an-tapa teacht ar chúrsaí, go háirithe i gcás géarchéime, ní féidir linn a ghealladh go mbeidh an chomhairle taistil i nGaeilge go hiomlán cothrom le dáta. Lena chinntiú go bhfaighidh tú an chomhairle is déanaí, go háirithe maidir le stádas slándála, féach an leagan Béarla chomh maith, nó déan teagmháil díreach linn.

Stádas slándála

Má tá tú ag pleanáil cuairt chun na Síne, moltar duit a bheith cúramach.

An Foláireamh Taistil is Déanaí

Ionfhabhtuithe an fhliú éanúil H7N9 i ndaoine sa tSín

Tá os cionn 130 cás ionfhabhtaithe ó fhoirm de Fhliú Éanúil ar a dtugtar fliú A (H7N9), a bhí forleathan i mí Aibreán 2013, deimhnithe ag Coimisiún Pleanála Sláinte agus Teaghlaigh na Síne. Go dtí seo tá os cionn 40 duine básaithe mar gheall ar an ráig. Tá tionchar ag an ráig ar bhardais Shanghai agus Bhéising agus na cúigí máguaird.

Léigh an mhír shláinte sa rannán Eolas Breise den leathanach seo le haghaidh tuilleadh eolais.

Cláraigh linn

Má tá sé i gceist agat cuairt a thabhairt ar an tSín nó fanacht ann, ba chóir duit do chuid mionsonraí a chlárú linn, ionas go bhféadfaimid tú a aimsiú go tapa sa chás go dtarlódh géarchéim nach raibh súil léi, mar shampla tubaiste nádúrtha, nó eachtra éigeandála i do theaghlach, agus tú thar lear.  Ansin, d’fhéadfaimis cabhair a thairiscint duitse nó do do theaghlach más gá.

Comhairle uainne

Moltar duit an méid is féidir a fhoghlaim faoin tSín sula dtéann tú ann.

Moltar duit freisin an treoir taistil Eolas Roimh Thaisteal a léamh chun leideanna praiticiúla a fháil ar thaisteal thar lear.

Cúnamh éigeandála

Is minic gur fearr a bhíonn daoine áitiúla in ann cabhrú leat, mar sin labhair le muintir na háite, d’ionadaí tionscnóra turas nó bainistíocht d’óstáin.

Déan teagmháil leis an Ambasáid

I gcás éigeandála, nó má tá cabhair agus comhairle uait, féadfaidh tú teagmháil a dhéanamh le Ambasáid na hÉireann i mBéising

Má ghlaonn tú lasmuigh d’uaireanta oibre, fág teachtaireacht le:

  • D’ainm
  • An cineál fadhb atá agat
  • An áit a bhfuil tú anois
  • Do chuid mionsonraí teagmhála (uimhir fón póca nó uimhir theileafóin don áit a bhfuil tú ag fanacht ann)

Déanaimid monatóireacht rialta ar na teachtaireachtaí sin agus déanfaidh duine den fhoireann teagmháil leat.

Conas is féidir linn cabhrú leat

Tá go leor taithí againn cabhrú le saoránaigh de chuid na hÉireann a mbíonn fadhbanna acu agus iad thar lear. Foghlaim níos mó faoin gcineál cúnaimh éigeandála is féidir linn a thairiscint duit.

 

Sábháilteacht agus Slándáil

Comhairle phraiticiúil

  • Léigh an treoir taistil Eolas Roimh Thaisteal chun leideanna slándála áisiúla a fháil maidir le taisteal thar lear
  • Faigh eolas go háitiúil maidir le ceantair lena mbaineann baol agus ábhair imní slándála
  • Déan réamhchúram ciallmhar maidir le sábháilteacht agus slándáil
  • Bíodh an té le dul i dteagmháil leis i gcás éigeandála ar eolas agat

Corraíl shibhialta

Tá cúrsaí polaitíochta réasúnta cobhsaí sa tSín ach uaireanta is féidir le corraíl shibhialta briseadh amach. Seachain tionóil mhóra agus léirsithe, a d’fhéadfadh éirí foréigneach agus a bhféadfadh deacrachtaí dlí leanúint astu. Tá rialacháin i gcoinne aon léirsithe poiblí nach bhfaigheann cead ó na húdaráis roimh ré, agus déantar iad a fheidhmiú go dian. D’fhéadfadh rannpháirtithe a bheith faoi réir ag dianchaingean dlí. Fan amach ó láithreáin mhíleata - d’fhéadfaí pionós a ghearradh mar gheall ar phictiúir a thógáil d’ionaid mhíleata nó slándála, agus de roinnt foirgneamh poiblí.

Sceimhlitheoireacht

Cé go bhfuil an baol ó sceimhlitheoireacht sa tSín íseal, tá baol domhanda ann fós ó ionsaithe sceimhlitheoireachta neamh-idirdhealaitheacha, a d’fhéadfadh a bheith dírithe ar thargaidí sibhialta, lena n-áirítear áiteanna ina gcruinníonn turasóirí agus easaoránaigh.

Coiriúlacht

Is ceann scríbe réasúnta sábháilte é an tSín, ach moltar duit a bheith cúramach mar sin féin:

  • Ná bíodh do chárta creidmheasa, do thicéid taistil ná do chuid airgid ar iompar in éineacht agat – fág airgead breise agus nithe luachmhara in áit shábháilte.
  • Ná bíodh do phas ar iompar agat ach amháin má tá géarghá leis agus fág cóip de do phas (agus de do dhoiciméid taistil agus árachais) le do theaghlach nó le cairde sa bhaile.
  • Ná taispeáin méideanna móra airgid go poiblí agus ná bain úsáid as ATManna tar éis thitim na hoíche, go háirithe má bhíonn tú leat féin. Seiceáil nach bhfuil aon duine do do leanúint tar éis duit do chuid gnó a chur i gcrích.
  • Seachain sráideanna agus staighrí dorcha nó gan soilse. Socraigh síob a fháil ó/go dtí chomh gar do dhoras d'óstáin/d'árasáin agus is féidir.
  • Coinnigh súil ghéar ar do chuid stuif agus coinnigh greim air in áiteanna poiblí mar caiféanna idirlín agus stáisiúin bus nó traenach.

Mionghadaíocht

Tá an méid peasghadaíocht agus gadaíocht a tharlaíonn ag dul i méid agus dá bhrí sin ba chóir duit a bheith ar an airdeall maidir le do shlándáil phearsanta, mar a bheifeá sa bhaile.

Nótaí  bainc góchumtha

Tá nótaí bainc góchumtha, go háirithe nótaí góchumtha RMB100, ag éirí níos coitianta. Cuir ceist sa bhanc nó san áit a ndéanann tú airgead a mhalartú conas nótaí bréige a aithint. Seiceáil nótaí sula nglacann tú leo, mar a fheicfidh tú go leor úinéirí siopa agus tiománaithe tacsaí ag déanamh.

Camscéimeanna turasóirí

Is iomaí camscéim ann, go háirithe sna ceantair mhóra turasóireachta i gcathracha móra, atá dírithe ar airgead a bhaint d'eachtrannaigh. Tagann daoine chuig taistealaithe agus tugann siad cuireadh dóibh tae a ól, cuairt a thabhairt ar thaispeántas ealaíne nó Béarla a labhairt mar chleachtadh; cuirtear iallach ar an taistealaí aineolach saothar ealaíne costasach (nach fiú dada é) a cheannach nó tugtar bille an-mhór dó don tae.  Ní dóigh go ndéanfaidh na póilíní áitiúla aon rud i ndíospóid tráchtála mar sin, dá bhrí sin ná glac le haon chuireadh den sórt sin.

Deochanna meisciúla bréige

Tá sé coitianta ag beáir agus clubanna oíche deochanna meisciúla bréige a dhíol, a bhfuil iompraíocht fhoréigneach agus díchuimhne leanúint as agus fágadh roinnt saoránach de chuid na hÉireann i gcásanna an-leochaileacha. Moltar duit a bheith eolach maidir leis an méid óil a dhéanann tú.

Coir a chur in iúl

Má fhulaingíonn tú coir agus tú sa tSín, cuir in iúl do na póilíní láithreach é.  Féadfaidh tú teagmháil a dhéanamh linn ag Ambasáid na hÉireann i mBéising má tá cabhair uait.

Tiomáint

Má tá sé i gceist agat a bheith ag tiomáint sa tSín, ba chóir duit a bheith an-chúramach mar go bhfuil sábháilteacht ar bhóithre sa tSín in ann a bheith an-dona. Más mian leat a bheith ag tiomáint:

  • Tabhair leat do cheadúnas tiomána idirnáisiúnta agus bí cinnte go bhfuil árachas iomchuí agus dóthanach agat
  • Tá sé in aghaidh an dlí tiomáint faoi thionchar an óil nó drugaí agus tá baol go gcoinneofaí tú, go gcuirfí fíneáil ort nó go gcuirfí toirmeasc ar thiomáint ort dá mbéarfaí ort
  • Bí ar an eolas faoi dhlíthe tráchta na Síne, mar shampla luasteorainneacha
  • Caith crios sábhála i gcónaí
  • Caith clogad agus tú ag rothaíocht nó ar ghluaisrothar
  • Coinnigh doirse na feithicle faoi ghlas agus ná bíodh málaí le feiceáil, ar fhaitíos go ndéanfaí iarracht iad a ghoid agus tú stoptha ag soilse tráchta

Coisithe

Bí an-chúramach ag dul trasna bóithre mar choisí

Iompar Poiblí

Moltar duit gan tacsaithe ná busanna neamhdhleathacha a úsáid.

Feithicil a fhruiliú

Má tá feithicil á fruiliú agat, moltar duit gan do phas a thabhairt ar lámh mar shlándáil.  Fiú má thugann tú cead do phas a fhótachóipeáil, bíodh sé le feiceáil agat an t-am ar fad.

Seiceáil go bhfuil árachas dóthanach agat agus léigh téarmaí & coinníollacha an chonartha fruilithe feithicle (go háirithe aon tarscaoileadh a mbeadh feidhm leis dá ndéanfaí damáiste don fheithicil).

 

Dlíthe agus gnásanna áitiúla

Comhairle phraiticiúil

  • Léigh an chomhairle taistil, cuir tú féin ar an eolas sula dtaistealaíonn tú agus faigh comhairle go háitiúil nuair a bhaineann tú ceann scríbe amach
  • Cuimhnigh go mbaineann na dlíthe áitiúla leatsa, mar chuairteoir, agus nach mór duit cloí leo
  • Bí measúil ar nósanna, ar thraidisiúin agus ar chleachtais áitiúla, mar go mb’fhéidir go bhféachfaí ar an gcaoi a n-iompraíonn tú tú féin mar iompar a bheadh as bealach, naimhdeach nó in aghaidh an dlí

Coireacht

Má tá amhras ann go raibh tú páirteach i gcoir, nó má bhí tú páirteach in aighneas pearsanta nó gnó, tá sé de cheart ag na húdaráis do phas a bhaint díot, chun cosc a chur ort an tír nó an réigiún áirithe ina bhfuil tú a fhágáil go dtí go mbeidh réiteach ar an ábhar.

Drugaí neamhdhleathacha

Gearrtar pionós géar ar úsáid drugaí neamhdhleathacha (is cuma cén druga é), lena n-áirítear fíneálacha agus téarmaí príosúin fada, nó fiú pionós an bháis, gan aird ar náisiúntacht duine.

Aois dlíthiúil

Caitear le duine 14 bliain d’aois agus níos sine mar a chaitear le duine fásta faoin dlí sa tSín.

Creideamh

Tá srianta ar sheanmóireacht agus ar ábhair chráifeacha a scaipeadh. Tá toirmeasc ar an ngluaiseacht Falun Gong sa tSín.

Dlí tráchtála

I gcásanna díospóide a bhaineann le dlí tráchtála, ba chóir dlíodóir a fhostú ar bhonn tosaíochta. Ní fhéadfaidh an Ambasáid idirghabháil a dhéanamh i gcás díospóide tráchtála.

Náisúnacht na Síne agus leanaí

Luaitear i ndlí na Síne gur náisiúnaigh de chuid na Síne iad leanaí a bheirtear do náisiúnaigh de chuid na Síne, gan aird ar shaoránacht an tuismitheora eile. Dá bhrí sin is iad na tuismitheoirí atá freagrach as a chinntiú go gcláraítear a linbh i gceart tar éis a bhreithe. Ní fhéadfaidh Ambasáid na hÉireann aon idirghabháil a dhéanamh i gcásanna ar náisiúnach de chuid na Síne go príomha é an leanbh.

Tubaistí nádúrtha agus an aeráid

Comhairle phraiticiúil

  • Má tá tú ag taisteal chun na Síne, bí cinnte go dtuigeann tú cad atá romhat – ansin pleanáil agus pacáil dá réir 
  • Faigh comhairle áitiúil faoin méid a cheart a dhéanamh i gcás eachtra tromchúiseach nó i gcoinníollacha contúirteacha
  • Comhoibrigh le húdaráis áitiúla agus le seirbhísí éigeandála i gcás eachtra tromchúiseach

Comhairle Taistil Te Fuara

Crith Talún

Tá an tSín i gcrios seismeach gníomhach agus tarlaíonn mórchreathanna talún ann go tréimhsiúil. Ba chóir duit tú féin a chur ar an eolas leis na treoirlínte de chuid Ghníomhaireacht Bainistíochta Éigeandála Fheidearálach na Stát Aontaithe le go mbeidh a fhios agat cad a bheidh le déanamh i gcás éigeandála.

Tuilte

I gcás tuilte, ba chóir duit déanamh ar thalamh ard agus fanacht go n-ísleoidh na tuilte. Tá ról ag míleata na Síne maidir le daoine i gceantair faoi thuilte a aslonnú; má bhaineann cás mar sin leatsa, ba chóir duit a dtreoracha a leanúint go dian ar mhaithe le sábháilteacht.

Tíofúin

Tá tíofúin coitianta feadh chósta thoir-theas na Síne idir Bealtaine agus mí na Samhna. Seiceáil an nuacht áitiúil agus idirnáisiúnta sula dtéann tú ag taisteal lena chinntiú nach mbeidh tú in áit a mbeidh tíofún.

Eolas Breise

Riachtanais iontrála (víosa/pas)

Víosa

Teastaíonn víosa ó shaoránaigh na hÉireann le dul chun na Síne. Féadfaidh tú do víosa a fháil ón Ambasáid is gaire duit de chuid na Síne sula n-imíonn tú.

Tháinig Dlí Isteach agus Amach nua i bhfeidhm an 1 Iúil 2013. Tá tionchar aige sin ar eachtrannaigh a bhfuil cónaí orthu sa tSín de bharr go bhfuil roinnt catagóirí víosa (mar shampla víosaí F) athraithe. Ina theannta sin, ní fhéadfaidh síntí víosa dul thar téarma an víosa bhunaidh agus mar gheall air sin ní féidir le taistealaithe a bhfuil víosa 30 lá acu iarratas a dhéanamh ar shíneadh 30 lá ach aon uair amháin.

Má tá sé i gceist agat dul ag obair sa tSín agus do chlann a thabhairt leat d’fhéadfadh go mbeadh ort teastais pósta agus breithe fíordheimhnithe a chur isteach lena n-iarratais ar chónaí. D’fhéadfadh go mbeadh ort doiciméadú eile a fhíordheimhniú freisin. Ní féidir le hAmbasáid na hÉireann doiciméid a fhíordheimhniú; is í an Roinn Gnóthaí Eachtracha i mBaile Átha Cliath amháin ar féidir léi do theastais a fhíordheimhniú, agus le go mbeidís bailí de réir dlí sa tSín ba chóir iad a dhlisteanú ansin ag Ambasáid na Síne i mBaile Átha Cliath. Molaimid go ndéanfá na ceanglais seo a sheiceáil le d’fhostóir roimh thaisteal. 

Má theastaíonn uait síneadh ama a chur leis an víosa nó iarratas a dhéanamh ar cheann nua agus tú sa tSín, caithfidh tú iarratas a dhéanamh tríd an mBiúró Slándála Poiblí áitiúil. Ní fhéadfaidh Ambasáid na hÉireann sa tSín aon chomhairle a thabhairt maidir le riachtanais nó próisis víosa. Ba chóir do thaistealaithe agus saoránaigh de chuid na hÉireann a bhfuil cónaí orthu sa tSín cuairt a thabhairt ar an láithreán gréasáin seo a leanas chun tuilleadh eolais a fháil maidir le beartas víosaí.

Clárú

Caithfidh eachtrannaigh clárú leis an mBiúró Slándála Poiblí áitiúil laistigh de 24 uair an chloig ón am a thagtar chun na Síne.  Má tá tú ag fanacht in óstán nó i mbrú, rachaidh siad i mbun an nós imeachta sin thar do cheann. Má tá tú ag fanacht le cairde nó le daoine den teaghlach, caithfidh tú clárú go pearsanta.

Pas

Ní mór do thaistealaithe a bpas nó fótachóip dá bpictiúr pas agus leathanach víosa a bheith ar iompar acu i gcónaí.

Réigiúin Riaracháin Speisialta Hong Cong agus Macau

Oibrítear beartas víosa éagsúil i Réigiúin Riaracháin Speisialta Hong Cong agus Macau seachas mórthír na Síne. Má théann tú ón mórthír go ceachtar de na ceantair sin, teastóidh víosa iliontrála uait le go mbeidh tú in ann filleadh ar an mórthír.

An Tibéid

Tá srian ar thaisteal chun na Tibéide, agus ní féidir dul ann ach amháin má tá cead taistil agat. Laistigh den tSín, féadfaidh tú iarratas a dhéanamh chuig Oifig Gnóthaí Eachtracha Réigiún Féinrialaithe na Tibéide. Má tá tú ag déanamh iarratais ó thar lear, téigh i gcomhairle le Ambasáid áitiúil na Síne nó le do ghníomhaire taistil.

Sláinte

Seiceáil le do dhochtúir i bhfad roimh thaisteal má tá aon vacsaíniú ag teastáil le dul chun na Síne.

Fliú Éanúil/Fliú A(H7N9)

Tá os cionn 130 cás ionfhabhtaithe ó fhoirm de Fhliú Éanúil ar a dtugtar fliú A (H7N9), a bhí forleathan i mí Aibreán 2013, deimhnithe ag Coimisiún Pleanála Sláinte agus Teaghlaigh na Síne. Go dtí seo tá os cionn 40 duine básaithe mar gheall ar an ráig. Tá tionchar ag an ráig ar bhardais Shanghai agus Bhéising agus na cúigí máguaird. Bhí ionfhabhtaithe forleathan i mí Aibreán 2013.

Tá eolas cothrom le dáta ag an Eagraíocht Dhomhanda Sláinte (WHO) ar a láithreán gréasáin:  

Ba chóir féachaint ar na Ceisteanna & Freagraí seo a leanas freisin, ina bhfuil leideanna áisiúla do thaistealaithe.