Fianáin

Úsáidimid fianáin ionas go bhfaighidh tú an taithí is fearr ar ár láithreán agus comhlíonaimid ár gceanglais Cosanta Sonraí ag an am céanna. Lean ort gan do chuid socruithe a athrú, agus gheobhaidh tú fianáin, nó athraigh do chuid socruithe fianáin ag aon tráth.

Skip to main content

Tubaistí nádúrtha

Is cuma cén áit a bhfuil tú ag dul, ba chóir duit a bheith ullamh i gcomhair aeráid na háite agus i gcomhair tubaiste nádúrtha ar bith a d'fhéadfadh dul i gcion ar do cheann scríbe.

Comhairle phraiticiúil

  • Faigh árachas taistil cuimsitheach.
  • Cláraigh do chuid sonraí linne roimh imeacht duit ionas gur féidir linn dul i dteagmháil leat i gcás éigeandála.
  • Léigh an chomhairle taistil uainn faoi do cheann scríbe.
  • Faigh comhairle ó mhuintir na háite faoi céard le déanamh i gcás eachtra thromchúiseach nó dálaí contúirteacha.
  • Comhoibrigh leis na húdaráis áitiúla agus leis na seirbhísí éigeandála má tharlaíonn eachtra thromchúiseach.
  • Má bhíonn tú sáite in eachtra thromchúiseach, inis dúinne, do do theaghlach agus do do chairde go bhfuil tú sábháilte. Is féidir leat teagmháil a dhéanamh leis an Roinn Gnóthaí Eachtracha agus Trádála ag +353 1 408 2000

Spéirlingí

Drochstoirmeacha trópaiceacha is ea spéirlingí, a d'fhéadfadh a bheith ina gcúis le gaoth mhór, báisteach throm, tuilte, sciorradh láibe agus tornádó. Tugtar cioclóin nó tíofúin orthu freisin (ag brath ar an réigiún ina dtarlaíonn siad).

Seasann séasúr na spéirlingí ó thús mhí an Mheithimh go dtí deireadh mhí na Samhna, agus is féidir leis dul i bhfeidhm ar an Aigéan Atlantach agus an Aigéan Ciúin, ar Mhuir Chairib, agus ar Mhurascaill Mheicsiceo.

Má tá tú ag brath taisteal chuig tír ina dtarlaíonn stoirmeacha go minic, ba chóir duit a bheith ag faire ar scéalta áitiúla agus idirnáisiúnta na haimsire le linn do chuairte. Is féidir leat eolas mionsonraithe faoin aimsir agus faoi rianú stoirmeacha a fháil ó Lárionad Spéirlingí SAM agus ón Eagraíocht Mheitéareolaíoch Dhomhanda. Lean treorach na n-údarás i gcónaí faoi shlándáil agus aslonnú.

Creathanna talún

Tarlaíonn creathanna talún go rialta ar fud an domhain, ach ní chuirtear mórán suntais iontu mar gheall go mbíonn siad beag. Mar sin féin, má tharlaíonn crith talún atá ar leibhéal a sé nó níos mó ar an scála Richter, d'fhéadfadh sé a bheith ina chúis le damáiste mór agus bás.

Faigh amach an bhfuil tú ag taisteal go dtí crios gníomhach creathanna talún trí fhéachaint ar léarscáil na réigiún ina bhfuil seans maith go dtarlódh crith talún ar shuíomh gréasáin an Chláir Dhomhanda Measúnachta ar Ghuais Sheismeach. Ba cheart duit a fháil amach freisin ó mhuintir na háite nó ó d'óstán cad ba cheart duit a dhéanamh i gcás crith talún.

Súnámaithe

Is tonnta aigéin iad súnámaithe, a tharlaíonn de bharr brúchtaí bolcánacha nó creathanna talún go minic. Is féidir leo a bheith thar a bheith contúirteach agus d'fhéadfadh siad réigiúin a léirscriosadh agus a lán daoine a mharú. Má tá tú ag taisteal go dtí ceantar cósta i gcrios ina bhfuil baol súnámaí, bí ar an airdeall ar fhaitíos go n-eiseodh na húdaráis rabhadh súnámaí. Is féidir leat níos mó eolais a léamh faoi céard is ceart a dhéanamh i gcás súnámaí ach féachaint ar shuíomh gréasáin an Ionaid Faisnéise Idirnáisiúnta um Shúnámaithe.

Bolcáin

D'fhéadfadh a lán cineálacha éagsúla gníomhaíochta bolcánaí a bheith i gceist, idir mhionshruthanna laibhe agus phléascanna ollmhóra a dhéanfadh damáiste forleathan. Déantar monatóireacht chúramach ar bholcáin de ghnáth, agus is féidir le heolaithe rabhadh éigin a thabhairt roimh ré de ghnáth roimh aon eachtra thromchúiseach.

Má tá tú ag taisteal go dtí ceantar ina bhfuil bolcán gníomhach, bí ag faire go cúramach ar thuairiscí ón gceantar. Agus cuairt á tabhairt ar bholcán agat, seachain nach rachfá ró-ghar dó toisc go bhféadfadh pléascanna gaile agus luatha tarlú gan choinne tráth ar bith. Ba chóir duit cuimhneamh freisin gur féidir le luaithreamhán bolcánach cur isteach go mór ar sheirbhísí taistil.

Tuilte

Is féidir le báisteach throm agus stoirmeacha an mhonsúin a bheith ina gcúis le tuilte contúirteacha, sciorradh láibe agus sciorradh talún. D'fhéadfadh éifeachtaí tubaisteacha a bheith aige sin, lena n-áirítear bás, scrios bailte agus sráidbhailte iomlána agus cur isteach ar chúrsaí iompair.

Má tá tú ag tabhairt cuairte ar limistéar ina mbíonn tuilte, coinnigh suas le réamhaisnéis na haimsire sa réigiún agus pleanáil dá réir. Cinntigh go bhfuil do dhóthain uisce óil stóráilte agat agus seiceáil go bhfuil bealaí intaistil roimh thabhairt faoi thuras fada. Bíonn baol níos mó ó ghalair uisce-iompartha le linn tuilte troma agus mar sin seachain nach n-ólfá uisce éillithe.

Maidhmeanna

Bíonn baol ann ó mhaidhmeanna agus ráthanna sneachta i réigiúin shléibhtiúla, áit nach féidir an aimsir a thuar i gcónaí agus inar féidir léi athrú go tobann. Má tá tú ag beartú dul ag sciáil, ag dreapadóireacht nó ag fánaíocht, coinnigh súil ghéar ar an aimsir agus ar dhálaí sábháilteachta sa cheantar. Gheobhaidh tú tuilleadh sonraí ó na Seirbhísí Rabhadh um Maidhmeanna na hEorpa. Bí cinnte go bhfuil trealamh cuí agat agus inis do dhuine éigin i gcónaí céard atá beartaithe agat. Lean comhairle na n-údarás áitiúil agus cloígh le gach rabhadh agus fógra scríofa. Ba chóir duit seiceáil freisin go gclúdaíonn d'árachas taistil gach gníomhaíocht atá beartaithe.

Tinte foraoise

Is féidir le tinte foraoise a bheith ina bhfadhb mhór i roinnt tíortha ina mbíonn an aimsir an-tirim. Bíonn éifeachtaí tubaisteacha ag na tinte sin agus is gnách go ngearrtar pionóis ghéara ar shárú na rialacha, ar nós neamhaird a dhéanamh de thoirmeasc iomlán ar thinte. Bí freagrach i gcónaí agus tú ag tabhairt cuairte ar limistéir faoi chrainn agus ná las beárbaiciú ná ná fág aon bhruscar i do dhiaidh má tá seans ann go bhféadfadh ráigeanna tine tarlú sa cheantar. Coinnigh súil ghéar ar na tuairiscí ar fhaitíos go n-eiseofaí rabhadh faoi thinte foraoise agus seachain aon limistéir ina bhféadfadh rabhadh faoi thinte a bheith i bhfeidhm.