Fianáin

Úsáidimid fianáin ionas go bhfaighidh tú an taithí is fearr ar ár láithreán agus comhlíonaimid ár gceanglais Cosanta Sonraí ag an am céanna. Lean ort gan do chuid socruithe a athrú, agus gheobhaidh tú fianáin, nó athraigh do chuid socruithe fianáin ag aon tráth.

Skip to main content

An tSeapáin

Má tá tú ag taisteal chun na Seapáine, gheobhaidh tú leideanna praiticiúla agus eolas áisiúil sa mhír comhairle taistil agus san eolas nuashonraithe.

Faigh árachas taistil agus liachta

Faigh árachas taistil cuimsitheach i gcónaí a chlúdóidh gach costas liachta thar lear, aslonnú liachta san áireamh, sula dtéann tú ag taisteal. Ní féidir linn íoc as aon chostais éigeandála a d’fhéadfadh a bheith ort ar do thuras. Mar sin, d’fhéadfadh árachas taistil go leor leor airgid a shábháil duit, má bhíonn fadhbanna agat. Ná déan dearmad na coinníollacha i do pholasaí a léamh agus a chinntiú go gclúdaíonn sé gach rud atá beartaithe agat a dhéanamh.

Forléargas

Déanaimid ár ndícheall an chomhairle taistil is déanaí a thabhairt duit i nGaeilge, ach mar gheall go bhféadfadh athrú an-tapa teacht ar chúrsaí, go háirithe i gcás géarchéime, ní féidir linn a ghealladh go mbeidh an chomhairle taistil i nGaeilge go hiomlán cothrom le dáta.  Lena chinntiú go bhfaighidh tú an chomhairle is déanaí, go háirithe maidir le stádas slándála, féach an leagan Béarla chomh maith, nó déan teagmháil díreach linn.

Stádas slándála

Má tá tú ag pleanáil cuairt a thabhairt ar an tSeapáin, moltar duit réamhchúram a dhéanamh.

Foláireamh taistil

Ba chóir duit réamhchúram a dhéanamh nuair a théann tú chuig áiteanna a buaileadh de bharr na creatha talún/súnámaí, a bhí ann ar 11 Márta 2011 (ceantair chósta Iwate, Miyagi agus Fukushima Prefectures).

Ná taistil i bhfoisceacht 20 cileaméadar de Stáisiún Núicléach Fukushima Daiichi in Fukushima Prefecture áit a bhfuil saincheantar eisiaimh de chuid Rialtas na Seapáine in áit. Seachain taisteal neamhriachtanach chuig ceantair lasmuigh de sin, áit ar aimsíodh láithreacha radaíochta.

Cláraigh linn

Má tá sé i gceist agat cuairt a thabhairt ar an tSeapáin nó fanacht ann, ba chóir duit do chuid mionsonraí a chlárú linn, ionas go bhféadfaimid tú a aimsiú go tapa sa chás go dtarlódh géarchéim nach raibh súil léi, mar shampla tubaiste nádúrtha, nó eachtra éigeandála i do theaghlach, agus tú thar lear. Ansin, d’fhéadfaimis cabhair a thairiscint duitse nó do do theaghlach más gá.

Comhairle Uainne

Moltar duit an méid is féidir a fhoghlaim faoin tSeapáin sula dtéann tú ann.

Moltar duit freisin an treoir taistil Eolas Roimh Thaisteal a léamh chun leideanna praiticiúla a fháil ar thaisteal thar lear.

Cúnamh Éigeandála

Is minic gur fearr a bhíonn daoine áitiúla in ann cabhrú leat, mar sin labhair le muintir na háite, d’ionadaí tionscnóra turas nó bainistíocht d’óstáin.

Sonraí teagmhála do sheirbhísí éigeandála

Póilíní: 110

Déan teagmháil leis an Ambasáid

I gcás éigeandála, nó má tá cabhair agus comhairle uait, féadfaidh tú teagmháil a dhéanamh le hAmbasáid na hÉireann i dTóiceo.

Má ghlaonn tú lasmuigh d’uaireanta oibre, fág teachtaireacht le:

  • D'ainm
  • An cineál faidhbe atá agat
  • An áit a bhfuil tú anois
  • Do chuid mionsonraí teagmhála (uimhir fón póca nó uimhir theileafóin don áit a bhfuil tú ag fanacht ann)

Déanaimid monatóireacht rialta ar na teachtaireachtaí sin agus déanfaidh duine den fhoireann teagmháil leat.

Conas is féidir linn cabhrú leat

Tá go leor taithí againn cabhrú le saoránaigh de chuid na hÉireann a mbíonn fadhbanna acu agus iad thar lear. Foghlaim níos mó faoin gcineál cúnaimh éigeandála is féidir linn a thairiscint duit.

 

Sábháilteacht agus Slándáil

Comhairle phraiticiúil

  • Léigh an treoir taistil Eolas Roimh Thaisteal chun leideanna slándála áisiúla a fháil maidir le taisteal thar lear
  • Faigh eolas go háitiúil maidir le ceantair lena mbaineann baol agus ábhair imní slándála
  • Déan réamhchúram ciallmhar maidir le sábháilteacht agus slándáil
  • Bíodh an té le dul i dteagmháil leis i gcás éigeandála ar eolas agat

Coiriúlacht

Tá ráta coiriúlachta sách íseal sa tSeapáin ach ba chóir duit réamhchúram a dhéanamh mar sin féin: 

  • Ná bíodh do chárta creidmheasa, do thicéid taistil ná do chuid airgid ar iompar in éineacht agat – fág airgead breise agus nithe luachmhara in áit sábháilte
  • Ná taispeáin méideanna móra airgid go poiblí agus ná bain úsáid as ATManna tar éis thitim na hoíche, go háirithe má bhíonn tú leat féin. Seiceáil nach bhfuil aon duine do do leanúint tar éis duit do chuid gnó a chur i gcrích.
  • Seachain sráideanna agus staighrí dorcha nó gan soilse. Socraigh síob a fháil ó/go dtí chomh gar do dhoras d'óstáin/d'árasáin agus is féidir.
  • Coinnigh súil ghéar ar do chuid stuif agus coinnigh greim air in áiteanna poiblí mar caiféanna idirlín agus stáisiúin bus nó traenach.

Sábháilteacht phearsanta

Ba chóir go mbeadh tú ar an eolas gur tuairiscíodh roinnt mhaith cásanna inár déanadh spíceáil ar dheochanna i limistéir áirithe i dTóiceo. Moltar duit a bheith airdeallach i mbeáir, agus amhras a bheith ort faoi dheochanna a thairgeann strainséirí duit in ionaid oíche agus in áiteanna ina gcruinníonn turasóirí sa tráthnóna.

Coiriúlacht a chur in iúl

Má fhulaingíonn tú coir agus tú sa tSeapáin, cuir in iúl do na póilíní áitiúla láithreach é. Agus féadfaidh tú teagmháil a dhéanamh linn ag Ambasáid na hÉireann i dTóiceo má tá cabhair uait.

Tiomáint

Tiomáintear ar thaobh na láimhe clé den bhóthar sa tSeapáin.  Má tá sé i gceist agat a bheith ag tiomáint sa tSeapáin, tá na bóithre coinnithe go maith agus tá rialacha an bhóthair mórán mar a chéile le rialacha bóthair na hÉireann.

Más mian leat a bheith ag tiomáint:

  • Tabhair leat do cheadúnas idirnáisiúnta tiomána agus bí cinnte go bhfuil árachas iomchuí agus dóthanach agat
  • Gearrtar pionós géar ar dhaoine a mbéartar orthu ag tiomáint faoi thionchar an óil nó as cead a thabhairt do dhuine eile tiomáint, mar shampla, más paisinéir tú i bhfeithicil atá á tiomáint ag tiománaí atá faoi thionchar an óil.
  • Bí ar an eolas faoi dhlíthe tráchta na Seapáine, mar shampla luasteorainneachas
  • Caith crios sábhála i gcónaí
  • Coinnigh doirse na feithicle faoi ghlas agus ná bíodh málaí le feiceáil, ar fhaitíos go ndéanfaí iarracht iad a ghoid agus tú stoptha ag soilse tráchta

Beidh ar chónaitheoirí fadtéarmacha ar mian leo tiomáint sa tSeapáin ceadúnas intíre tiomána a fháil laistigh dá gcéad bhliain sa tír. Is féidir eolas faoi sin a fháil ar láithreán gréasáin Ambasáid na hÉireann i dTóiceo.

Feithicil a fhruiliú

Má tá feithicil á fruiliú agat, moltar duit gan do phas a thabhairt ar lámh mar shlándáil. Fiú má thugann tú cead do phas a fhótachóipeáil, bíodh sé le feiceáil agat an t-am ar fad.

Seiceáil go bhfuil árachas dóthanach agat agus léigh téarmaí & coinníollacha an chonartha fruilithe feithicle (go háirithe aon tarscaoileadh a mbeadh feidhm leis dá ndéanfaí damáiste don fheithicil).

 

Dlíthe agus gnásanna áitiúla

Comhairle phraiticiúil

  • Léigh an chomhairle taistil, cuir tú féin ar an eolas sula dtaistealaíonn tú agus faigh comhairle go háitiúil nuair a bhaineann tú ceann scríbe amach
  • Cuimhnigh go mbaineann na dlíthe áitiúla leatsa, mar chuairteoir, agus nach mór duit cloí leo
  • Bí measúil ar nósanna, ar thraidisiúin agus ar chleachtais áitiúla, mar go mb’fhéidir go bhféachfaí ar an gcaoi a n-iompraíonn tú tú féin mar iompar a bheadh as bealach, naimhdeach nó in aghaidh an dlí.
  • You should carry your passport or Japanese residence card at all times while in Japan.

Drugaí neamhdhleathacha

Gearrtar pionós géar ar úsáid drugaí neamhdhleathacha (is cuma cén druga é), lena n-áirítear fíneálacha agus téarmaí fada príosúin. 

Alcól

Tá na gnásanna agus na dlíthe a bhaineann le alcól a ól sa tSeapáin mórán mar a chéile leo siúd atá in Éirinn. Gearrtar pionós géar ar dhaoine a mbéartar orthu ag tiomáint faoi thionchar an óil nó as cead a thabhairt do dhuine eile tiomáint faoi thionchar an óil, mar shampla, más paisinéir tú i bhfeithicil atá á tiomáint ag tiománaí atá faoi thionchar an óil. 

Ba chóir go mbeadh tú ar an eolas gur tuairiscíodh roinnt mhaith cásanna inár déanadh spíceáil ar dheochanna i limistéir áirithe i dTóiceo.

Tubaistí nádúrtha agus an aeráid

Comhairle phraiticiúil

  • Má tá tú ag taisteal chun na Seapáine, bí cinnte go dtuigeann tú cad atá romhat – ansin pleanáil agus pacáil dá réir
  • Faigh comhairle áitiúil faoin méid a cheart a dhéanamh i gcás eachtra tromchúiseach nó i gcoinníollacha contúirteacha
  • Comhoibrigh le húdaráis áitiúla agus le seirbhísí éigeandála i gcás eachtra tromchúiseach

Comhairle Taistil Te Fuara

Creathanna talún agus súnámaithe

Is saincheantar creathanna talún an-ghníomhach é an tSeapáin agus tarlaíonn creathanna talún a bhíonn ar mhéideanna éagsúla ar fud na tíre go minic. Ba chóir do shaoránaigh de chuid na hÉireann atá ag taisteal chun nó ina gcónaí sa tSeapáin iad féin a chur ar an eolas faoi céard is ceart a dhéanamh i gcás creatha talún.

Bhuail crith talún a bhí ar mhéid 9 ar an Scála Richter oirthuaisceart na Seapáine ar 11 Márta 2011.  Bhuail súnámaí a tháinig ina dhiaidh sin cósta an oirthuaiscirt agus maraíodh daoine go leor agus déanadh scrios mór ar mhaoin agus ar infreastruchtúr. Ba chóir do shaoránaigh a théann ar cuairt ar cheantair ar an gcósta a bheith thar a bheith airdeallach faoi fholáirimh súnámaithe a d’fhéadfadh údaráis na Seapáine a eisiúint. 

Eisíonn Lárionad Foláirimh Súnámaithe an Aigéin Chiúin foláirimh faoi shúnámaithe.

Srianta thart ar stáisiún núicléach Fukushima

Rinne an crith talún agus an súnámaí a bhí ann i Márta 2011 damáiste go leor freisin do Stáisiún Núicléach Fukushima Daiichi in Fukushima Prefecture (240 cileaméadar as Tóiceo) rud a d’fhág gur scaoileadh líon suntasach radaíochta san aer agus san fharraige. 

Tá saincheantar eisiaimh curtha i bhfeidhm ag údaráis na Seapáine i gceantar 20 cileaméadar thimpeall an Stáisiúin agus is coir é a bhfuil pionós ag dul leis dul isteach go neamhdhleathach sa saincheantar seo. Tá tuilleadh áiteanna eisiamh nach bhfuil éigeantach lasmuigh den saincheantar 20 cileaméadar seo, inar haimsíodh láithreacha radaíochta níos lú. Molann rialtas na hÉireann taisteal neamhriachtanach a sheachaint sna ceantair seo, atá le feiceáil ar mhapa rialtas na Seapáine.  Féadfaidh tú seiceáil freisin chun eolas cothrom le dáta a fháil ó rialtas na Seapáine faoi na leibhéil radaíochta thart ar Stáisiún Fukushima. Tá monatóireacht chuimsitheach á déanamh ag údaráis na Seapáine faoi thruailliú uisce agus bia a d’fhéadfadh a bheith ag tarlú agus tá siad ag cur srianta diana i bhfeidhm nuair is gá. Tá bail sheasmhach ar chúrsaí ag stáisiún núicléach Fukushima Daiichi, cé go dtógfaidh sé os cionn fiche nó tríocha bliain an stáisiún a dhíchoimisiniú agus a dhí-éilliú.

Tá cúrsaí ar ais ina gceart a bheag nó a mhór sa chuid eile d’oirthuaisceart na Seapáine agus níl cúis ar bith gur cheart taisteal chuig an réigiún sin a sheachaint ná a chur ar athló, fad is go ndéantar réamhchúram ciallmhar.

Tíofúin

Bíonn séasúr tíofún na Seapáine ann ó Mheitheamh go Meán Fómhair, agus is sa tréimhse idir Lúnasa agus Meán Fómhair is mó a bhíonn tíofúin gníomhach. Go minic bíonn taoidí arda agus sciorradh talún ann i rith thréimhsí leanúnacha de bháisteach throm in éineacht leis na tíofúin a bhuaileann an tSeapáin.

Ba chóir do thaistealaithe chun na Seapáine (go háirithe réigiúin an deiscirt) aird a thabhairt ar eolas áitiúil taistil agus dul i gcomhairle le Gníomhaireacht Mheitéareolaíoch na Seapáine (JMA) a chuireann eolas ar fáil i mBéarla. Ba chóir duit seiceáil le d’aerlíne nó le do thionscnóir turas roimh thaisteal.

Bolcáin

Tá roinnt bolcán gníomhach sa tSeapáin. Ba chóir duit aird a thabhairt ar eolas ó údaráis na Seapáine roimh thaisteal chuig ceantair ina bhfuil bolcáin.
Tá Mt Kirishima in Miyazaki/Kagoshima Prefectures, Kyushu, agus Mt Sakurajima in Kagoshima Prefecture, Kyushu, ag Leibhéal Foláirimh 3 (ná téigh gar den bholcán) faoi láthair, ar chomhairle ón JMA. Téigh i gcomhairle leis na meáin áitiúla má theastaíonn tuilleadh eolais uait.

Eolas Breise

Riachtanais iontrála (víosa/pas)

Mura bhfuil tú cinnte faoi riachtanais iontrála na Seapáine, lena n-áirítear eolas faoi víosaí agus eolas inimirce eile, cuir ceist ar do ghníomhaire taistil nó déan teagmháil leis an Ambasáid nó Consalacht de chuid na Seapáine is gaire duit.

Féadfaidh tú seiceáil leo freisin cén tréimhse bailíochta nach mór a bheith ag do phas. Moltar duit roinnt fótachóipeanna de do phas a thabhairt leat. Ba chóir duit fótachóip de do phas a iompar an t-am ar fad le linn do chuairte.

Nósanna imeachta iontrála agus inimirce

Ó Shamhain 2007, i dtaca le nósanna imeachta iontrála, de réir mionleasú a cuireadh ar an Acht um Smachta Inimirce agus Aitheantas Teifeach, glactar méarlorg agus grianghraf digiteach ó na cuairteoirí eachtrannacha ar fad a théann isteach chun na Seapáine le linn nósanna imeachta iontrála.

Diúltófar cead isteach chun na Seapáine dóibh siúd nach dtabharfaidh cead a méarlorg ná grianghraf digiteach a ghlacadh. Beidh díolúine ó na nósanna imeachta seo ag daoine atá faoi bhun aois 16, cónaitheoirí buana a bhfuil stádas speisialta acu agus iad siúd atá i mbun gníomhartha a dhéanfadh siad siúd a bhfuil stádas cónaithe acu, "taidhleoir" nó "gnó oifigiúil rialtais". Is féidir an t-eolas ar fad a fháil ar láithreán gréasáin an Bhiúró Inimirce, de chuid na Roinne Dlí agus Cirt.

Sláinte

Seiceáil le do dhochtúir i bhfad roimh thaisteal má tá aon vacsaíniú ag teastáil le dul chun na Seapáine.

Cógas

Tá srianta ar iomportáil roinnt cógas ar oideas agus thar an gcuntar, lena n-áirítear cineálacha áirithe cógas ailléirge agus cuais. Má theastaíonn cuairt a thabhairt ar an dochtúir, tá roinnt clinicí ann ina labhraíonn na hoibrithe Béarla agus tá a gcuid seirbhísí fógartha go forleathan acu. D’fhéadfadh sé, áfach, nach mbeifí in ann an cógas a fháil faoin ainm-bhranda céanna agus atá ar fáil in Éirinn. 

Scoileanna teanga

Tá go leor scoileanna a fheidhmíonn i mBéarla sa tSeapáin a bhíonn ag earcú múinteoirí ó thar lear. Molann an Roinn go láidir d’iarratasóirí poist sonraí na dtéarmaí agus na gcoinníollacha ina gconarthaí ionchasacha agus a ngníomhaireacht/fostóir ionchasach a scrúdú, lena chinntiú go bhfuil siad lánsásta le dea-sheasamh na ngníomhaireachtaí/bhfostóirí sin agus go gcomhlíonfar a gcoinníollacha fostaíochta.

Airgead agus baincéireacht

D’fhéadfadh sé go mbeadh deacrachtaí ag cuairteoirí chun na Seapáine airgead a fháil ó roinnt ATManna ag úsáid cártaí arna n-éisiúint in Éirinn. Moltar do chuairteoirí malairt bealaí a bheith acu le teacht ar airgead sa chás go mbeadh fadhbanna le cártaí (e.g. cárta creidmheasa ag a bhfuil saoráid réamhíoctha airgid nó seiceanna taistil).