Fianáin

Úsáidimid fianáin ionas go bhfaighidh tú an taithí is fearr ar ár láithreán agus comhlíonaimid ár gceanglais Cosanta Sonraí ag an am céanna. Lean ort gan do chuid socruithe a athrú, agus gheobhaidh tú fianáin, nó athraigh do chuid socruithe fianáin ag aon tráth.

Skip to main content

Iamáice

Má tá tú ag taisteal go Iamáice, gheobhaidh tú leideanna praiticiúla agus eolas áisiúil sa mhír comhairle taistil agus san eolas nuashonraithe.

Faigh árachas taistil agus liachta

Faigh árachas taistil cuimsitheach i gcónaí a chlúdóidh gach costas liachta thar lear, aslonnú liachta san áireamh, sula dtéann tú ag taisteal. Ní féidir linn íoc as aon chostais éigeandála a d’fhéadfadh a bheith ort ar do thuras. Mar sin, d’fhéadfadh árachas taistil go leor leor airgid a shábháil duit, má bhíonn fadhbanna agat. Ná déan dearmad na coinníollacha i do pholasaí a léamh agus a chinntiú go gclúdaíonn sé gach rud atá beartaithe agat a dhéanamh.

Forléargas

Déanaimid ár ndícheall an chomhairle taistil is déanaí a thabhairt duit i nGaeilge, ach mar gheall go bhféadfadh athrú an-tapa teacht ar chúrsaí, go háirithe i gcás géarchéime, ní féidir linn a ghealladh go mbeidh an chomhairle taistil i nGaeilge go hiomlán cothrom le dáta.  Lena chinntiú go bhfaighidh tú an chomhairle is déanaí, go háirithe maidir le stádas slándála, féach an leagan Béarla chomh maith, nó déan teagmháil díreach linn.

Stádas slándála

Má tá tú ag pleanáil cuairt ar Iamáice, moltar duit a bheith thar a bheith cúramach.

Foláireamh taistil

Cé go bhfuil an staid éigeandála a fógraíodh tar éis na corraíola sibhialta in Kingston, in St Andrew agus in St Catherine in 2010 crochta, tá baol ann fós go n-ardóidh gníomhaíocht na bhfórsaí slándála ins na ceantair seo agus i gceantair eile. Lean na treoracha ó fhórsaí slándála Iamáice i gcónaí. Bíodh a fhios agat faoin leibhéal ard coiriúlachta go ginearálta atá in Kingston agus seachain West Kingston agus ceantair i lár na cathrach.

Cláraigh linn

Má tá sé i gceist agat cuairt a thabhairt ar Iamáice nó fanacht inti, ba chóir duit do chuid mionsonraí a chlárú linn, ionas go bhféadfaimid tú a aimsiú go tapa sa chás go dtarlódh géarchéim nach raibh súil léi, mar shampla tubaiste nádúrtha, nó eachtra éigeandála i do theaghlach, agus tú thar lear. Ansin, d’fhéadfaimis cabhair a thairiscint duitse nó do do theaghlach más gá.

Comhairle Uainne

Moltar duit an méid is féidir a fhoghlaim faoi Iamáice sula dtéann tú ann.

Moltar duit freisin an treoir taistil Eolas Roimh Thaisteal a léamh chun leideanna praiticiúla a fháil ar thaisteal thar lear.

Cúnamh Éigeandála

Is minic gur fearr a bhíonn daoine áitiúla in ann cabhrú leat, mar sin labhair le muintir na háite, d’ionadaí tionscnóra turas nó bainistíocht d’óstáin.  

Seirbhísí éigeandála

  • Póilíní: 119
  • Seirbhís otharchairr: 110

Déan teagmháil leis an Ambasáid

De bharr nach bhfuil Ambasáid ná Consalacht na hÉireann in Iamáice, táimid teoranta ó thaobh cúnamh a thairiscint duit i gcás éigeandála. Má theastaíonn cúnamh uait, áfach, féadfaidh tú teagmháil a dhéanamh le Ambasáid na hÉireann in Ottawa i gCeanada.

Má ghlaonn tú lasmuigh d’uaireanta oibre, fág teachtaireacht le:

  • D'ainm
  • An cineál faidhbe atá agat
  • An áit a bhfuil tú anois
  • Do chuid mionsonraí teagmhála (uimhir fón póca nó uimhir theileafóin don áit a bhfuil tú ag fanacht ann)

Déanaimid monatóireacht rialta ar na teachtaireachtaí sin agus déanfaidh duine den fhoireann teagmháil leat.

Ambasáid AE eile

Féadfaidh tú teagmháil a dhéanamh le Ambasáidí nó Consalachtaí de thíortha AE eile chomh maith, chun comhairle, tacaíocht agus cúnamh consalachta éigeandála a fháil.

Conas is féidir linn cabhrú leat

Tá go leor taithí againn cabhrú le saoránaigh de chuid na hÉireann a mbíonn fadhbanna acu agus iad thar lear. Foghlaim níos mó faoin gcineál cúnaimh éigeandála is féidir linn a thairiscint duit.

Sábháilteacht agus Slándáil

Comhairle phraiticiúil

  • Léigh an treoir taistil Eolas Roimh Thaisteal chun leideanna slándála áisiúla a fháil maidir le taisteal thar lear
  • Faigh eolas go háitiúil maidir le ceantair lena mbaineann baol agus ábhair imní slándála
  • Déan réamhchúram ciallmhar maidir le sábháilteacht agus slándáil
  • Bíodh an té le dul i dteagmháil leis i gcás éigeandála ar eolas agat

Corraíl shóisialta

Is féidir le léirsithe ar an toirt tarlú i gceantair nach mbíonn turasóirí iontu i lár chathair  Kingston. Seachain léirsithe agus cruinnithe poiblí, a d’fhéadfadh a bheith achrannach uaireanta. Coinnigh tú féin ar an eolas faoina bhfuil ag tarlú timpeall ort trí shúil a choinneáil ar na meáin áitiúla agus fanacht i dteagmháil le bainistíocht d’óstáin nó le d’ionadaí tionscnóra turas.

Coiriúlacht

Tá leibhéil arda coiriúlachta agus foréigin, lena n-áirítear fuadach, luaite le príomhchathair Iamáice, Kingston. Ba chóir duit réamhchúram ciallmhar a dhéanamh i gcónaí:

  • Ná bíodh do chárta creidmheasa, do thicéid taistil ná do chuid airgid ar iompar in éineacht agat – fág airgead breise agus nithe luachmhara in áit sábháilte
  • Ná bíodh do phas ar iompar agat ach amháin má tá géarghá leis agus fág cóip de do phas (agus de do dhoiciméid taistil agus árachais) le do theaghlach nó le cairde sa bhaile.
  • Ná taispeáin méideanna móra airgid go poiblí agus ná bain úsáid as ATManna tar éis thitim na hoíche, go háirithe má bhíonn tú leat féin. Seiceáil nach bhfuil aon duine do do leanúint tar éis duit do chuid gnó a chur i gcrích.
  • Seachain sráideanna agus staighrí dorcha nó gan soilse. Socraigh síob a fháil ó/go dtí chomh gar do dhoras d'óstáin/d'árasáin agus is féidir.
  • Coinnigh súil ghéar ar do chuid stuif agus coinnigh greim air in áiteanna poiblí mar caiféanna idirlín agus stáisiúin bus nó traenach.
  • Seachain West Kingston agus ceantair i lár na cathrach.
  • Is é an chúis go ndéantar ionsaithe ar thurasóirí go ginearálta ná chun iad a robáil. I gcásanna mar sin, níor chóir iad a throid.
  • Seachain ag siúl tríd an chathair san oíche, agus seachain ag siúl asat féin ag aon am.

Mionghadaíocht

Bí airdeallach faoi pheasghadaithe, mugálaithe agus daoine a ghoideann málaí, go speisialta in áiteanna ina gcruinníonn grúpaí móra daoine le chéile. Moltar duit fanacht in óstáin aitheanta amach as lár na cathrach.

Pas caillte / goidte

Má chailltear nó má ghoidtear do phas, ba chóir duit é a thuairisciú do na póilíní láithreach. Beidh sé níos éasca pas eile a fháil má tá tú in ann cóip den cheann a chaill tú nó a goideadh uait a chur ar fáil, mar sin coinnigh fótachóipeanna de do phas 

Coiriúlacht a chur in iúl

Má fhulaingíonn tú coir agus tú in Iamáice, cuir in iúl do na póilíní láithreach é.  Féadfaidh tú teagmháil a dhéanamh linn in Ambasáid na hÉireann in Ottawa má tá cabhair uait.

Tiomáint

Má tá sé i gceist agat a bheith ag tiomáint in Iamáice, ba chóir duit a bheith cúramach mar gheall go bhfuil ráta ard timpistí bóthair ann. Coinníonn an trácht in Iamáice ar an taobh clé den bhóthar ar nós mar a dhéantar in Éirinn, ach tá go leor den ghréasán bóithre, go speisialta lasmuigh de na príomhchathracha, i ndroch staid. Más mian leat a bheith ag tiomáint:

  • Tabhair leat do cheadúnas tiomána Éireannach iomlán agus bí cinnte go bhfuil árachas iomchuí agus dóthanach agat
  • Tá sé in aghaidh an dlí tiomáint faoi thionchar an óil nó drugaí agus tá baol go gcoinneofaí tú, go gcuirfí fíneáil ort nó go gcuirfí toirmeasc ar thiomáint ort dá mbéarfaí ort
  • Bí ar an eolas faoi dhlíthe tráchta Iamáice, mar shampla luasteorainneacha
  • Caith crios sábhála i gcónaí
  • Coinnigh doirse na feithicle faoi ghlas agus ná bíodh málaí le feiceáil, ar fhaitíos go ndéanfaí iarracht iad a ghoid agus tú stoptha ag soilse tráchta

Tacsaithe

Seachain busanna poiblí agus ná húsáid ach tacsaithe atá rialaithe ag an Jamaica Union of Travellers Association agus a ordaíonn tú ó d’óstán le n-úsáid duit féin amháin.

Feithicil a fhruiliú

Má tá feithicil á fruiliú agat, moltar duit gan do phas a thabhairt ar lámh mar shlándáil. Fiú má thugann tú cead do phas a fhótachóipeáil, bíodh sé le feiceáil agat an t-am ar fad.

Seiceáil go bhfuil árachas dóthanach agat agus léigh téarmaí & coinníollacha an chonartha fruilithe feithicle (go háirithe aon tarscaoileadh a mbeadh feidhm leis dá ndéanfaí damáiste don fheithicil).

Dlíthe agus gnásanna áitiúla

Comhairle phraiticiúil

  • Léigh an chomhairle taistil, cuir tú féin ar an eolas sula dtaistealaíonn tú agus faigh comhairle go háitiúil nuair a bhaineann tú ceann scríbe amach
  • Cuimhnigh go mbaineann na dlíthe áitiúla leatsa, mar chuairteoir, agus nach mór duit cloí leo
  • Bí measúil ar nósanna, ar thraidisiúin agus ar chleachtais áitiúla, mar go mb’fhéidir go bhféachfaí ar an gcaoi a n-iompraíonn tú tú féin mar iompar a bheadh as bealach, naimhdeach nó in aghaidh an dlí

Drugaí neamhdhleathacha

Caitheann údaráis Iamáice go han-dáiríre le ceist na ndrugaí neamhdhleathacha, cuma cé mhéad de a bhíonn i gceist agus d’fhéadfaí téarma príosúin a ghearradh faoi lastas an-bheag fiú amháin, de shubstaint a bhfuil toirmeasc uirthi. Tá coinníollacha an-ghéar i bpríosúin Iamáice. Níl caitheamh marijuana in Iamáice dleathach.

Tubaistí nádúrtha agus an aeráid

Comhairle phraiticiúil

  • Má tá tú ag taisteal chuig Iamáice, bí cinnte go dtuigeann tú cad atá romhat – ansin pleanáil agus pacáil dá réir
  • Faigh comhairle áitiúil faoin méid a cheart a dhéanamh i gcás eachtra tromchúiseach nó i gcoinníollacha contúirteacha
  • Comhoibrigh le húdaráis áitiúla agus le seirbhísí éigeandála i gcás eachtra tromchúiseach

Comhairle Taistil Te Fuara

Hairicín

Ba chóir do chuairteoirí chuig Iamáice a bheith ar an eolas go ritheann séasúr na hairicín sa Mhuir Chairib ó Mheitheamh go Samhain gach bliain, agus go mbíonn foláireamh faoi stoirmeacha móra go minic i rith an ama seo. Ba chóir duit súil a choinneáil ar an eolas is déanaí faoi réamhaisnéis na haimsire agus a bheith ar an eolas faoi céard is ceart a dhéanamh i gcás hairicín.